პარასკევს დიდი ბრიტანეთის მიერ ევროკავშირის დატოვების შესახებ ოფიციალური ინფორმაციის გავრცელებიდან უმოკლეს დროში გირვანქა სტერლინგის მკვეთრი დაცემის შემდეგ ფუნტი გაუფასურებას ისევ განაგრძობს. რეფრენდუმიდან მე–2 დღეს, 24 ივნისს, ერთხანს სტერლინგი აშშ დოლართან მიმართებაში 8%–ითაც კი დაეცა და 1 ფუნტი სტერლინგის ღირებულებამ 1.3228 აშშ დოლარი შეადგინა, შემდეგ კი ბრიტანულმა ვალუტამ გარკვეულ დონემდე მოიკრიბა ძალა და გაუფასურების ნიშნული 3.2 %–ით შემცირდა. ამის შესახებ BBC წერს.

სტერლინგის კურსი დოლართან მიმართებაში $1.3460 –ს შეადგენს, რაც 1.8%–ით დაბალია, თუმცა ეს, პარასკევს 1.3236 აშშ დოლარამდე ჩამოსვლასთან შედარებით უფრო მაღალი მაჩვენებელია.

FTSE 250 ინდექსი, რომელიც უმეტესად დიდ ბრიტანეთზე ფოკუსირებულ კომპანიებს მოიცავს, 1.8%–ით დაბლა ჩამოვიდა.

დიდი ბრიტანეთის საფონდო ბირჟების გახსნამდე ფინანსთა მინისტრმა ჯორჯ ოზბორნმა განცხადება გამოაქვეყნა, რომელშიც ნათქვამია, რომ დიდი ბრიტანეთი მზად არის მომავლის პირისპირ "ძლიერის პოზიციიდან" დადგეს.

მან ასევე დაადასტურა, რომ არ იქნება სასწრაფო სათადარიგო ბიუჯეტი. ოზბორნმა განაცხადა, რომ ჯერ კიდევ იქნება დიდი ბრიტანეთის ეკონომიკაში "კორექტირების" საჭიროება, მაგრამ დაამატა, რომ "გონივრული იქნება დაველოდოთ ახალ პრემიერ მინისტრს", სანამ ნებისმიერი ამგვარი ქმედებები განხორციელდება.

ორშაბათს ოქროს ფასმა 1.5%–ით მოიმატა. მისი ფასი ყოველთვის მატულობს ხოლმე გაურკვევლობებისას, რადგან ის უსაფრთხო აქტივად მიიჩნევა.