ხონის ადგილობრივი ხელისუფლების წარმომადგენლები სოფელ ქუტირის ადმინისტრაციული ერთეულის მოსახელობას შეხვდნენ. მათ სოფლებში პატარა ჯიხაიშში, ქუტირსა და გვაზაურში არსებული პრობლემების შესახებ ინფორმაცია მოსახლეობისაგან მიიღეს და დასმულ შეკითხვებს უპასუხეს. ამის შესახებ guardian.ge–ს ხონის მუნიციპალიტეტიდან აცნობეს.

გაზიფიცირება, საირიგაციო და საკანალიზაციო სისტემის მოწესრიგება, სოფლის ექიმის საკითხი, შიდა გზების რეაბილიტაცია - ეს ის საკითხებია, რასაც ქუტირის ადმინისტრაციული ერთეულის მოსახლეობა პრიორიტეტულ პრობლემებად მიიჩნევს.

"ვხვდებით ყველა მოქალაქეს და პრობლემებს ადგილზე ვეცნობით. ვაკეთებთ გასული წლის ანგარიშსა და სოციალური მიმართულებით არსებული სიახლეების შესახებ მოსახლეობას ინფორმაციას ვაწვდით. ჯანდაცვის თანადაფინანსების პროგრამები, ერთჯერადი დახმარებები, დიალეზის, ონკოპაციენტებისათვის, მრავალშვილიანი დედების, დედ-მამით ობოლთათვის არსებული შეღავათები და ა. შ. გამგეობის ეს სოციალური პროგრამები დღეს ხელმისაწვდომია ყველა ჩვენი თანამოქალაქისათვის, ისე როგორც არასდროს," - განაცხადა სოციალური სამსახურის უფროსმა ლეილა კინწურაშვილმა.

შეხვედრის ფარგლებში, მოსახლეობას საშუალება ეძლევა სამსახურების ხელმძღვანელებისაგან უშუალოდ მოისმინოს ხონის მუნიციპალიტეტში 2015 წელს განხორციელებული და 2016 წელს მიმდინარე და დაგეგმილი ინსფრასტრუქტურული, სოციალური, ეკონომიკური, კულტულური, სპორტული და საგანმანათლებლო პროგრამებისა და პროექტების შესახებ.