რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენელის, ზურაბ აბაშიძის განცხადებით, გიგა ოთხოზორიას მკვლელობის საქმეზე რუსეთის მხარეც არის პასუხისმგებელი და ამ პასუხისმგებლობას აფხაზეთის დე-ფაქტო ხელისუფლებას მთლიანად ვერ გადააბარებს.

ამის შესახებ აბაშიძემ პრაღაში, რუსეთის საგარეო საქმეთა მინისტრის მოადგილესთან, გრიგორი კარასინთან შეხვედრის დასრულების შემდეგ „საზოგადოებრივ მაუწყებელს“ განუცხადა.

მისი თქმით, ქართული მხარისთვის მიუღებელი და არაადეკვატურია გიგა ოთხოზორიას მკვლელობაში ეჭვმიტანილისთვის შინაპატიმრობის შეფარდება.

„ჩვენი პოზიციაა, რომ ეს დამნაშავე პიროვნება უახლოეს მომავალში უნდა იყოს დაპატიმრებული. ეს შინაპატიმრობა აბსოლუტურად არაადეკვატური გადაწყვეტილებაა. არსებობს საფრთხე იმისა, რომ მის სიცოცხლეს შეიძლება საფრთხე დაემუქროს და ამით საქართველოს ხელისუფლება დაინტერესებული არ არის. ამის თაობაზე პრემიერ-მინისტრმა და შს მინისტრმა გააკეთეს განცხადებები. რუსეთის მხრიდან პასუხი იყო, რომ ეს არის აფხაზეთის დე-ფაქტო ხელისუფლების პასუხისმგებლობა და არა რუსეთის მხარის. ასევე მოვისმინეთ მათი პასუხი, რომ ეს გადაწყევტილება შინაპატიმრობის შესახებ მართლაც არაადეკვატურია. ჩვენი აზრით, ეს არის რუსეთის მხარის პასუხისმგებლობაც და ამ პასუხისმგებლობას აფხაზეთის დე-ფაქტო ხელისუფლებას მთლიანად ვერ გადააბარებს“,-განაცხადა აბაშიძემ.

გიგა ოთხოზორიას მკვლელობაში ეჭვმიტანილ რაშიდ კანჯი-ოღლუს ოკუპირებული აფხაზეთის დე-ფაქტო სამხედრო სასამართლომ შინაპატიმრობა მიუსაჯა. ტრაგიკული შემთხვევა 19 მაისს, სოფელ ხურჩაში, საქართველოს მიერ კონტროლირებად ტერიტორიაზე მოხდა.