საქართველოს სტრატეგიისა და საერთაშორისო ურთიერთობების კვლევის ფონდის ხელმძღვანელის, კახა გოგოლაშვილის განცხადებით, რუსეთი 8 ოქტომბრის საპარლამენტო არჩევნებისგან სიურპრიზს ნამდვილად არ უნდა ელოდოს, რადგან ამ არჩევნებში პრორუსული ძალები ვერ გაიმარჯვებენ.

ამის შესახებ მან ჟურნალისტებთან საქართველოს საპარლამენტო არჩევნებთან დაკავშირებით გრიგორი კარასინის განცხადებაზე საუბრისას აღნიშნა.

„რუსეთი თავისი განცხადებებით თავის პოლიტიკას ატარებს, ახმოვანებს თავის მესიჯებს, ამიტომ ჩვენ კარასინის მიერ გაჟღერებული მესიჯები რაღაც ჭეშმარიტებად არ უნდა ჩავთვალოთ. ვიცით, რა აინტერესებს რუსეთს, როგორი არჩევნების შედეგები სჭირდება მას, მაგრამ ეს იმას არ ნიშნავს, რომ საქართველოს მოსახლეობა ისეთ არჩევანს გააკეთებს, რაც რუსეთს აწყობს. რაც შეეხება სიურპრიზებს, სიურპრიზები ნამდვილად არ იქნება და პრორუსული ძალები საქართველოს ხელისუფლებაში ვერ მოვლენ“, - განუცხადა ჟურნალისტებს კახა გოგოლაშვილმა.

გუშინ რუსეთის საგარეო საქმეთა მინისტრის მოადგილემ, გრიგორი კარასინმა პრაღაში, საქართველოს პრემიერ-მინისტრის სპეციალურ წარმომადგენელთან, ზურაბ აბაშიძესთან შეხვედრის დასრულების შემდეგ განაცხადა, რომ საქართველოს საპარლამენტო არჩევნებთან დაკავშირებით რუსეთისთვის სიურპრიზები ძნელი წარმოსადგენია.    

„ჩვენ გვაქვს იმედი, რომ საქართველო იქნება სტაბილური ქვეყანა. 8 ოქტომბერი ჩვენთვის საინტერესო დღეა. იმედი მაქვს, უფრო ნაკლებად სენსაციური იქნება, ვიდრე ბრიტანეთის რეფერენდუმის შედეგი. არჩევნები ყოველთვის საინტერესოა. რუსეთისთვის სიურპრიზები ძნელი წარმოსადგენია, ჩვენ მოვლენების ნებისმიერი განვითარებისთვის მზად ვართ, მაგრამ მაინც ვიმედოვნებთ, რომ სტაბილური კონსტრუქციული განვითარება ქვეყნისთვის დამახასიათებელი იქნება არჩვენების შემდეგ პერიოდშიც. გვიყვარს ქართველი ხალხი. იმედი გვაქვს, რომ ოდესმე შევძლებთ ამ სიტყვის ფართო გაგებით განვავითაროთ ურთიერთობები ყველა მიმართულებით სწორედ ამაზე ვმუშაობთ ზურაბ აბაშიძესთან“,-განაცხადა კარასინმა.