„თავდაცვის სამინისტროს გადაწყვეტილება, თავდაცვის მინისტრის დონეზე, კონკრეტული ბრძანების საფუძველზეა მიღებული, თუმცა ამ ყველაფერს საკანონმდებლო დონეზე გამყარება სჭირდება“,-განაცხადა „თავისუფალი დემოკრატების“ წევრმა, ირაკლი ჩიქოვანმა დღეს გამართულ პრესკონფერენციაზე.

მისი თქმითვე, ირაკლი ალასანიას ინიციატივა იყო, რომ 2016 წლიდან საქართველოს შეიარაღებული ძალები თავიდან ბოლომდე საკონტრაქტო პირობებზე გადასულიყო.

„2012 წელს, როდესაც ირაკლი ალასანია თავდაცვის მინისტრად დაინიშნა, საკონტრაქტო პირობებზე შეიარაღებული ძალების გადასვლის ინიციატივა მისი მხრიდან გაჟღერდა. ეს იყო პოზიცია, რომელიც აუცილებელი და მნიშვნელოვანია ჩვენი შეიარაღებული ძალების მოდერნიზაციისთვის და აუცილებელია იმისათვის, რათა ჩვენი შეიარაღებული ძალები ჩამოყალიბდეს როგორც მობილური, სწრაფი და ქმედუნარიანი. მიგვაჩნია, რომ ეს გადაწყვეტილება თავისი შინაარსით პოზიტიურია და ამ რეფორმის ინიციატივა ეკუთვნის ირაკლი ალასანიას. რაც შეეხება გადაწყვეტილებას, დროც ასე იყო განსაზღვრული, რომ ეს ყველაფერი 2016 წელს უნდა მომხდარიყო, თუმცა რა ვითარებაში მოხდა ამ საკითხის შეთანხმება პრემიერ-მინისტრთან თუ საქართველოს პრეზიდენტთან, ჩემთვის უცნობია. ეს მათი ხელისუფლების საქმეა და მათ უნდა გააკეთონ ამ თემასთან მიმართებაში განმარტებები. მაშინ, როცა უმრავლესობის წევრები გამოდიან და ამას თავნებობას უწოდებენ, როგორც მინიმუმ მიუღებელია, რადგან ყველას კარგად უნდა ესმოდეს, რომ ყველაფერი ეხება შეიარაღებულ ძალებს“, - განაცხადა ირაკლი ჩიქოვანმა.

მან ასევე აღნიშნა, რომ შესაძლოა პარტია „ქართული ოცნების” წევრებს სურვილი აქვთ, რაც შეიძლება მალე იხილონ სხვა პარტიის წევრები კაბინეტს მიღმა, რათა მათ დაიკავონ ადგილები და სწორედ ამას უკავშირდება უმრავლესობაში გამოწვეული აჟიოტაჟი.