„დემოკრატიული მოძრაობის“ ლიდერმა დღეს ჟურნალისტებთან საუბრისას ტელეკომპანია „რუსთავი 2“-ს ჭეშმარიტებისა და სიმართლის მკვლელი უწოდა.

მისი თქმით, საქართველოს მოსახლეობა დღეს მოწმეა იმისა, რომ წინასაარჩევნო კამპანიიდან, ქვეყნის წინაპროვოკაციულ ან ქვეყნის დესტაბილიზაციის რეჟიმში გადაყვანა უნდათ.

„ქვეყანა წინასაარჩევნო პერიოდიდან წინაპროვოკაციულ რეჟიმში გადაჰყავთ! სხვა არაფერი ჰქვია იმ ე.წ. კვლევებს, რომელიც დღეს „რუსთავი 2“-მა გამოაქვეყნა. ჩვენ ამ ტელეკომპანიისაგან არ გვიკვირს მსგავსი კვლევები, იმიტომ, რომ არაერთგზის გვითქვამს, რომ ეს ტელევიზია ემსახურება ერთი კონკრეტული პარტიის ინტერესებს და არა ჭეშმარიტებისა და სიმართლის, თუნდაც სუბიექტური სიმართლის ინტერესებს“,-განაცხადა ნინო ბურჯანაძემ.

მან ასევე აღნიშნა, რომ არაერთგზის, „რუსთავი 2“ გამოდიოდა ჭეშმარიტებისა და სიმართლის მკვლელად.

„ეს იყო თუნდაც 2011 წლის 26 მაისს, როდესაც ხელისუფლება ცდილობდა იარაღით და ხელკეტებით მოვეკალით, ხოლო „რუსთავი 2“ ცდილობდა მოვეკალით პოლიტიკურად იმ ცილისწამებითა და ტყუილებით, რომელიც იღვრებოდა მათი ეთერიდან“,-განაცხადა ნინო ბურჯანაძემ.

მისი თქმით, იგივე გრძელდება ახლაც.

„სახეზეა მცდელობა იმისა, რომ გაათანაბრონ ხელისუფლებისა და „ნაციონალური მოძრაობის“ რეიტინგი, ხოლო ნაცმოძრაობა თავისი სატელიტებით, როგორიც არის ალასანიას და ბურჭულაძის პარტიები, პრაქტიკულად უმრავლესობად წარმოაჩინონ.

ისეთი პოლიტიკის, რომელიც იქნება მართლაც დამოუკიდებელი პოლიტიკა და რომელიც ევროპის და ევროპის ქვეყნების ინტერესებისათვის იქნება მიმართული“,- განაცხადა ნინო ბურჯანაძემ.

მან ასევე აღნიშნა, რომ ბრიტანეთის რეფერენდუმმა, ვისაც ანალიზის გაკეთება შეუძლია, ყველას დაანახა, რომ მნიშვნელოვანია ყველგან, პოლიტიკაში იყვნენ პოლიტიკოსები, რომ ქვეყნის პრობლემებს წყვეტდნენ პოლიტიკოსები, დამოუკიდებელი და სწორად მოაზროვნე პოლიტიკოსები.

„ასეთ შემთხვევაში არც ევროპას და არც ჩვენს ქვეყანას მსგავსი პრობლემები არ ექნება. კიდევ ერთხელ ვიმეორებ, ჩვენი მიზანი არ შეიძლება იყოს მხოლოდ და მხოლოდ ორგანიზაციებში გაწევრიანება, ჩვენი მიზანია და უნდა იყოს, რომ ნებისმიერი ორგანიზაცია და ნებისმიერ ორგანიზაციასთან ურთიერთობა გამოყენებული იყოს ქვეყნის ინტერესების განსახორციელებლად და ქვეყნის პრობლემების მოსაგვარებლად. ეს უნდა იყოს ამოსავალი წერტილი და ასეთ შემთხვევაში ქვეყანას ნაკლები პრობლემები ექნება“,-განაცხადა „დემოკრატიული მოძრაობის“ ლიდერმა.

ტელეკომპანია „რუსთავი 2“-ის დაკვეთით გერმანულ-ამერიკულმა ორგანიზაციამ (GFK) სოციოლოგიური კვლევა ჩაატარა. ჩატარებული სოციოლოგიური კვლევის მიხედვით, კითხვაზე - „თუ ჩავთვლით, რომ 8 ოქტომბრის საპარლამენტო არჩევნებში მონაწილეობთ, რომელ პარტიას მისცემდით ხმას?“ - გამოკითხულთა 1.6%-მა  „ნინო ბურჯანაძე - დემოკრატიული მოძრაობა-ერთიანი საქართველო“ დაასახელა.