ექსპერტ თორნიკე შარაშენიძის განცხადებით, რუსეთი საქართველოს დღევანდელ მთავრობას კარგად არის შეგუებული და მას ჩვენს ქვეყანაში ცვლილებები არ ენდომება.

აღნიშნულით შარაშენიძე  საქართველოს საპარლამენტო არჩევნებთან დაკავშირებით რუსეთის საგარეო საქმეთა მინისტრის მოადგილის გრიგორი კარასინის მიერ გაკეთებულ განცხადებას გამოეხმაურა.

„გრიგორი კარასინი ამბობს, რომ რუსეთი მზად არის ყველა სცენარისათვის. მან თქვა, რომ იმედია, Brexit არ მოხდებაო. ამით ალბათ პარალელი გაავლო იმასთან, რომ საქართველოში შეიძლება ოპოზიციამ გაიმარჯვოს. რუსეთს ალბათ აწყობს დღევანდელი სიტუაცია შენარჩუნდეს - დღევანდელი სიტუაციით უფრო მშვიდად არიან, როცა არაფერი იძვრის, დღევანდელ მთავრობას კარგად არიან შეგუებული და არა მგონია, მათ აქ ცვლილებები უნდოდეთ“, - განაცხადა თორნიკე შარაშენიძემ და დასძინა, რომ არ არის გამორიცხული რუსეთმა აქ ჯარი შემოიყვანოს და „მშვიდობა“ დაამყაროს.

„ასეთი სიტუაციისთვის ჩვენც უნდა ვიყოთ მზად. ამის ერთადერთი გარანტია, რომ ეს არ მოხდეს, არის ქართული-ამერიკული ერთობლივი წვრთნები“, - აღნიშნა მან.

გუშინ რუსეთის საგარეო საქმეთა მინისტრის მოადგილემ, გრიგორი კარასინმა პრაღაში, საქართველოს პრემიერ-მინისტრის სპეციალურ წარმომადგენელთან, ზურაბ აბაშიძესთან შეხვედრის დასრულების შემდეგ განაცხადა, რომ საქართველოს საპარლამენტო არჩევნებთან დაკავშირებით რუსეთისთვის სიურპრიზები ძნელი წარმოსადგენია.        

„ჩვენ გვაქვს იმედი, რომ საქართველო იქნება სტაბილური ქვეყანა. 8 ოქტომბერი ჩვენთვის საინტერესო დღეა. იმედი მაქვს, უფრო ნაკლებად სენსაციური იქნება, ვიდრე ბრიტანეთის რეფერენდუმის შედეგი. არჩევნები ყოველთვის საინტერესოა. რუსეთისთვის სიურპრიზები ძნელი წარმოსადგენია, ჩვენ მოვლენების ნებისმიერი განვითარებისთვის მზად ვართ, მაგრამ მაინც ვიმედოვნებთ, რომ სტაბილური კონსტრუქციული განვითარება ქვეყნისთვის დამახასიათებელი იქნება არჩვენების შემდეგ პერიოდშიც. გვიყვარს ქართველი ხალხი. იმედი გვაქვს, რომ ოდესმე შევძლებთ ამ სიტყვის ფართო გაგებით განვავითაროთ ურთიერთობები ყველა მიმართულებით სწორედ ამაზე ვმუშაობთ ზურაბ აბაშიძესთან“,-განაცხადა კარასინმა.