უხვი ნალექის შედეგად ადიდებულმა მდინარემ, აჭარაში ქედისა და შუახევის რაიონებში რამდენიმე საავტომობილო ხიდი წაიღო. შუახევში ოთხი სოფელი გარე სამყაროსაა მოწყვეტილი, 400-მდე ოჯახი კი ელექტროენერგიის გარეშე დარჩა.

არსებული ინფორმაციით, ქედის მუნიციპალიტეტში 50 წლამდე მამაკაცი მეწყერში მოყვა. ის საქონლის მოსაძებნად იყო წასული, რა დროსაც ნიაღვარი მოვარდა. სამსაათნახევრიანი ოპერაციის შემდეგ მამაკაცის უსაფრთხო ადგილას გაყვანა მოხერხდა.

სტიქია განსაკუთრებით ძლიერი იყო შუახევის მუნიციპალიტეტის უჩამბის ადმინისტრაციულ ერთეულში, სადაც უკიდურესად ადიდდა მდინარეები, რიგ ადგილებში განვითარდა ღვარცოფები და მეწყერული მოვლენები, დაიტბორა ნათესი კულტურები.

ადიდებულმა მდინარეებმა უჩამბის ადმინისტრაციულ ერთეულში წაიღო ქვაფთის ხიდი და ოთხი სოფელი (წაბლანა, სამოლეთი, მოფრინეთი, ლაკლაკეთი) მოწყვეტილია შუახევი-უჩამბის საავტომობილო გზას.

როგორც შუახევის მუნიციპალიტეტის გამგებელმა, ტარიელ ებრალიძემ  guardian.ge-ს განუცხადა, მუნიციპალიტეტმა დამეწყრილი ეზოების გამო, 10 ოჯახი  უსაფრთხო ადგილზე გადაიყვანა.

მისივე თქმით, მთელი ღამის განმავლობაში ადგილზე მუშაობდნენ სამაშველო ბრიგადები.

„გუშინ წვიმის შედეგად, რომელიც 6 საათიდან დაიწყო, ოთხი სოფელი იყო მოწყვეტილი გარე სამყაროს, თუმცა იყო ალტერნატიული გზა, იმ შემთხვევაში თუ იქნებოდა ვინმე ავადმყოფი ან ადგილობრივი მკვიდრი გადასაყვანი. მოსახლეობას არ მიეწოდებოდა ელექტროენერგია. მთელი ღამის განმავლობაში მუშაობდა სამაშველო შტაბი. ადგილზე იმყოფება როგორც ადგილობრივი, ისე ცენტრალური ხელისუფლების წარმომადგენლები. ამჟამად მობილიზებულია ტექნიკა და მიმდინარეობს გზების გაწმენდა. აღსადგენი გვაქვს რამდენიმე ხიდი, სადაც უკვე საგზაო დეპარტამენტის წარმომადგენლები მუშაობენ, გაკეთდება ხარჯთაღრიცხვა და შესაბამისად, ძალიან მოკლე დროში გვინდა ელექტროენერგიის და გზის აღდგენა“,-განაცხადა ებრალიძემ.