შეფასებისა და გამოცდების ეროვნული ცენტრის ხელმძღვანელის, მაია მიმინოშვილის ცნობით, ერთიან ეროვნულ გამოცდებზე აბიტურიენტების რეგისტრაციამ მშვიდ ვითარებაში ჩაიარა.
მისი თქმით, რეგისტრაცია დაიწყო დილით, 08:00 საათზე, 09:00 საათზე კი პროცესი ყველა საგამოცდო ცენტრში დასრულდა.
„მთელი საქართველოს მასშტაბით 21 საგამოცდო ცენტრი ფუნქციონირებს. რეგისტრაციამ ძალიან მშვიდ ვითარებაში ჩაიარა. 4 საათი და 15 წუთია გამოყოფილი იმისთვის, რომ შეასრულონ მათთვის განკუთვნილი დავალება. წინა წლებთან შედარებით 15 წუთით არის საგამოცდო დრო გაზრდილი იმის გამო, რომ ჩვენ სიახლე შევთავაზეთ აბიტურიენტებს - მათ ელექტრონული ბუკლეტები მიეწოდებათ და 15 წუთი სწორედ ამის გამო დაემატათ. ზუსტად 14:00 საათზე, დაიწყება მეორე სესიის რეგისტრაცია. 15:00 საათზე აბიტურიენტების შემდეგი ნაკადი დაიწყებს ტესტებზე მუშაობას”, - განაცხადა მაია მიმინოშვილმა.
მაია მიმინოშვილი აბიტურიენტებს გამოცდაზე მოქცევის წესების მაქსიმალურად დაცვას სთხოვს. მისი თქმით, გამოცდაზე მოქცევის წესები აპლიკანტების პირად გვერდზეც არის განთავსებული.
„წესებში შევიტანეთ პუნქტი, რომ აპლიკანტი საგამოცდო ცენტრში არ უნდა გამოცხადდეს ნასვამ მდგომარეობაში, ან ნარკოტიკული საშუალებების ზემოქმედების ქვეშ. ჩემი თხოვნაა მაქსიმალურად დავიცვათ წესები, რადგან მათთვისვე კარგია მშვიდ და მისაღებ პირობებში ჩატარდეს გამოცდები. რა თქმა უნდა, ჩვენთვის ძალიან მტკივნეულია, როდესაც ცალკეულ შემთხვევაში აპლიკანტის გამოცდიდან მოხსნა გვიწევს. გაითვალისწინონ პუნქტები, რა შემთხვევაში შეიძლება აბიტურიენტი გამოცდიდან მოიხსნას”, - აღნიშნა მაია მიმინოშვილმა.
დღეიდან ერთიანი ეროვნული გამოცდები დაიწყო. აბიტურიენტები პირველ გამოცდას ქართულ ენასა და ლიტერატურაში აბარებენ. აპლიკანტების რეგისტრაცია 08:00 საათზე, საგამოცდო პროცესი კი, 09:00 საათზე დაიწყო.
წელს პირველად, გამოცდები ნაწილობრივ ელექტრონული ფორმატით ჩატარდება. ფორმატის ცვლილება მხოლოდ ტესტის და არა პასუხების ფურცლის ელექტრონულად მიწოდებას ითვალისწინებს.
საქართველოს მასშტაბით 21 საგამოცდო ცენტრი მუშაობს, აქედან 9 თბილისშია.
ერთიან ეროვნულ გამოცდებზე რეგისტრირებულია 38 500 -ზე მეტი აბიტურიენტი; სტუდენტთა საგრანტო კონკურსზე 4 000 - მდე სტუდენტი; საერთო სამაგისტრო გამოცდაზე 12 500 - ზე მეტი კანდიდატი; პედაგოგთა საგნობრივ გამოცდაზე 22 700 - ზე მეტი პედაგოგი.
ერთიანი ეროვნული გამოცდები 22 ივლისს, ფიზიკის გამოცდით დასრულდება.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.