გერმანიის საგარეო საქმეთა მინისტრის, ფრანკ-ვალტერ შტაინმაიერის განცხადებით, ყველამ გააცნობიერა, არა მხოლოდ დაძაბულობაა მთიან ყარაბაღში, არამედ ხშირ შემთხვევაში დაძაბულობა კიდევ უფრო რთულ ფორმაში, ესკალაციაში გადაიზრდება ხოლმე.

ამის შესახებ შტაინმაიერმა ქართველ კოლეგასთან შეხვედრის შემდეგ ერთობლივად გამართულ პრესკონფერენციაზე განაცხადა და აღნიშნა, რომ საქართველოს მთავრობა ძალიან პრაგმატულ პოლიტიკას ახორციელებს და ცდილობს ახალი დაპირისპირების კერების თავიდან აცილებას.

„ჩვენ ვნახეთ მთიან ყარაბაღში რა ხდებოდა გასული თვეების განმავლობაში. უამრავი ადამიანი დაიღუპა. მართალია, ჩვენ მოვახერხეთ დროებით დაგვეწყნარებინა ეს პრობლემა, მაგრამ ეს არ არის გრძელვადიანი გადაწყვეტა. თუმცა, გერმანია, როგორც ეუთო-ს თავმჯდომარე ქვეყანა, სხვებთან ერთად ცდილობს საბოლოო წერტილი დაუსვას ამას და აწარმოოოს მოლაპარაკებები, რომ არა მხოლოდ სტატუს კვო აღადგინოს და გაყინოს კონფლიქტი, არამედ ქმედითად და მდგრადად მოაგვაროს”, - განაცხადა გერმანიის საგარეო საქმეთა მინისტრმა.

მისი თქმითვე, შეხვედრაზე საუბარი შეეხო აფხაზეთს და „სამხრეთ ოსეთს“.

„არის სიტუაცია, რომელიც არ არის მარტივად სახეცვლადი, მიზანშეწონილად მიმაჩნია, რომ საქართველოს მთავრობა ძალიან პრაგმატულ პოლიტიკას ახორციელებს და ცდილობს ახალი დაპირისპირების კერების თავიდან აცილებას. კარი არის გახსნილი და ყველაფერი კეთდება საქართველოში იმისთვის, რათა სიტუაცია გაუმჯობესდეს და შეიცვალოს. მე ძალიან დიდი იმედი მაქვს, რომ ეუთო-მ შეიძლება აქაც დადებითი როლი ითამაშოს, ესკალაციის თავიდან ასაცილებლად. ძალიან დიდი მადლობა ეუთო-ს საგანგებო წარმომადგენელს მისი აქტიურობისთვის“, - აღნიშნა შტაინმაიერმა.