"საქართველო არის ქვეყანა, რომელთანაც გერმანიას აქვს ყველაზე მჭიდრო ორმხრივი ურთიერთობა“,-განაცხადა გერმანიის საგარეო საქმეთა მინისტრმა, ფრანკ-ვალტერ შტაინმაიერმა ქართველ კოლეგასთან შეხვედრის შემდეგ ერთობლივად გამართულ პრესკონფერენციაზე.

მისი თქმით, პარლამენტის თავმჯდომარე, პრემიერ-მინისტრი, თავდაცვის მინისტრი, შინაგან საქმეთა მინისტრი და საგარეო საქმეთა მინისტრი სტუმრობენ ხოლმე ბერლინს, რაც ხაზს უსვამს თუ რამდენად მჭიდროა ურთიერთობა ორ ქვეყანას შორის.

„გერმანიაში ვიზეიმეთ საქართველოს დამოუკიდებლობის 25 წელი, თქვენს პრემიერ-მინისტრთან ერათად, ეს მეტყველებს, რომ არა მხოლოდ პოლიტიკურია ჩვენი ურთიერთობები, არამედ სამოქალაქოც, ვინაიდან საზოგადოების არაერთი წარმომადგენელი იყო იქ, ვისაც ამ ურთიერთობის გაძლიერების ინტერესი აქვს“, - განაცხადა შტაინმაიერმა.

მისივე თქმით, ძალიან მნიშვნელოვანია კონტაქტი ორი ქვეყნის მოქალაქეებს შორის, ამიტომ კარგი იდეა იყო, რომ 2017 წელი იქნება ქართულ-გერმანული ურთიერთობის წელი, რათა კიდევ უფრო განმტკიცდეს.

„ვისაც აინტერესებს ესა თუ ის, ერთი ან მეორე ქვეყანა, ვისაც უნდა კულტურული თუ ეკონომიკური თვალსაზრისით წარმოაჩინოს საქართველო გერმანიაში და პირიქით, სწორედ ამაში ქართულ-გერმანული წელი გარკვეულ წვლილს შეიტანს. ჩვენ ვისაუბრეთ 2018 წელზე, როცა საქართველო იქნება წარმოდგენილი ძალიან აქტიურად ფრანკფურტის წიგნის ბაზრობაზე, რათა საქართველომ ლიტერატურული თვალსაზრისით წარმოაჩინოს ძალიან ფასეული ქართული კულტურა. დღეს არის განსაკუთრებული დღე საქართველოსთვის და ევროკავშირისთვის. ეს არის ასოცირების შეთანხმების ოფიციალურად, ყოვლისმომცველად ამოქმედების დღე. ეს არის ბევრად უფრო მეტი, ვიდრე შემთხვევითობა, რომ დღეს ორივე ვართ აქ. ფაქტი, რომ აქ ვარ კიდევ ერთხელ მაძლევს შესაძლებლობას, ჩემი უდიდესი პატივისცემა გამოვხატო იმ აქტიურობის და რეფორმებისთვის, რომელიც თქვენმა ქვეყანამ და თქვენმა მთავრობამ განახორციელა უკანასკნელი წლების განმავლობაში. ის პატივისცემა, რომელიც არა მარტო ჩემგან მოდის, არამედ მთლიანად გერმანიისგან და ევროკავშირისგან”, - განაცხადა გერმანიის საგარეო საქმეთა მინისტრმა.