თეა წულუკიანი ცდილობს, რომ ახმეტ ჩატაევის გათავისუფლებაზე პასუხისმგებლობა აირიდოს და არჩილ კბილაშვილს გადააბრალოს ყველაფერი, - აღნიშნული განცხადება "ერთიანი ნაციონალური მოძრაობის" წევრმა, ოთარ კახიძემ გააკეთა.

„იუსტიცის მინისტრმა თეა წულუკიანმა გუშინ გააკეთა განცხადება, რომ „ქართული ოცნების“ ხელისუფლებამ დაუშვა შეცდომა, როდესაც გაათავისუფლა ახმეტ ჩატაევი. 2013 წლის 30 მაისამდე მდგომარეობით საქართველოს პროკურატურას ხელმძღვანელობდა იუსტიციის მინისტრი, შესაბამისად მას ჰქონდა უფლებამოსილება, გაეუქმებინა ქვემდგომი პროკურორის მიერ მიღებული გადაწყვეტილება, რომელსაც ის არ ეთანხმებოდა. აგრეთვე მას ჰქონდა უფლება, რომ შეეცვალა ეს გადაწყვეტილება“, - განაცხადა კახიძემ.

მისი თქმით, ჩატაევის გათავისუფლება მოხდა საქართველოს პროკურატურის შუამდგომლობის საფუძველზე ვითომდა მტკიცებულებების არარსებობის გამო.

„აღნიშნულზე პირდაპირი და უშუალო პასუხისმგებლობა საქართველოს პროკურატურის მაშინდელ პირველ პირს, იუსტიციის მინისტრს თეა წულუკიანს ეკისრება. მისი მცდელობა, რომ აირიდოს თავიდან ეს პასუხისმგებლობა და გადააბრალოს ყველაფერი მაშინდელ მთავარ პროკურორს არჩილ კბილაშვილს, არ ცვლის იმ ფაქტს, რომ ჩატაევის გათავისუფლებაზე პასუხისმგებელია ხელისუფლება“, - განაცხადა ოთარ კახიძემ.

მისივე თქმით, თეა წულუკიანი ამბობს, რომ ის ამ გადაწყვეტილების წინააღმდეგი იყო, თუმცა მინისტრს შეეძლო ეს გადაწყვეტილება შეეცვალა.

„თუ წინააღმდეგი იყო ქვემდგომი პროკურორის გადაწყვეტილების, საქართველოს პროკურატურის შესახებ კანონის მე-2, მე-4 და მე-13 მუხლები მას აძლევდა საშუალებას, ეს გადაწყვეტილება შეეცვალა და მიეღო გადაწყვეტილება, რომელსაც იგი ეთანხმებოდა“, - განაცხადა ოთარ კახიძემ.

„როიტერსის“ ინფორმაციით, ახმეტ ჩატაევი მონაწილეობდა თურქეთში მომხდარ ტერაქტში, თუმცა, აღნიშნულ ინფორმაციას თურქეთის მთავრობა არ ადასტურებს.

ახმეტ ჩატაევი ლაფანყურის სპეცოპერაციის დროს საქართველოში დააკავეს . 2012 წელს პროკურატურის შუამდგომლობის საფუძველზე 5-ათას ლარიანი გირაოს სანაცვლოდ გაათავისუფლეს.