„გერმანია გვპირდება, რომ ის გამოიყენებს ყველა შესაძლო მექანიზმს და მის ხელთ არსებულ გავლენას, რომ მაქსიმალურად დაჩქარდეს ევროპარლამენტის მიერ შეჩერების მექანიზმის მიღება და შემდეგ უკვე დაჩქარდეს საქართველოს ვიზის ლიბერალიზაციის პროცესი“,-განაცხადა გიორგი კვირიკაშვილმა ჟურნალისტებთან საუბრისას, რითაც გერმანიის საგარეო საქმეთა მინისტრ, ფრანკ-ვალტერ შტაინმაიერის განცხადებას გამოეხმაურა, რომლის მიხედვითაც საქართველომ ვიზის ლიბერალიზაცია შესაძლოა, სექტემბერში მიიღოს.

მთავრობის მეთაურის თქმით, გერმანიის კანცლერის და გერმანიის საგარეო საქმეთა მინისტრი ასეთი განცხადებები ძალიან იმედის მომცემია.

„მე არ მინდა პროგნოზები გავაკეთო, მაგრამ ის, რომ გერმანიის კანცლერი იგივე სახის განცხადებებს აკეთებს და ის, რომ გერმანიის საგარეო საქმეთა მინისტრი ასეთ განცხადებებს აკეთებს, ჩემთვის ძალიან იმედის მომცემია. ჩვენ გავაგრძელებთ ძალიან აქტიურად მუშაობას ბრიუსელშიც, ევროპის დედაქალაქებშიც, რათა მივაღწიოთ ამ გადაწყვეტილებას. ეს არის მნიშვნელოვანი არა მხოლოდ მთავრობისთვის და არა არჩევნებისთვის, არამედ საქართველოს ევროპული არჩევანის გამყარებისთვის“, - განაცხადა გიორგი კვირიკაშვილმა.