საქართველოში ხვალიდან ამინდის გაუარესებას ელოდებიან. გარემოსა და ბუნებრივი რესურსების დაცვის სამინისტროს გარემოს ეროვნული სააგენტოს ინფორმაციით, ხვალ ქვეყნის ტერიტორიაზე გავრცელებას იწყებს შავი ზღვის ციკლონთან დაკავშირებული ნოტიო და კავკასიონიდან დაშვებული ცივი ჰაერის მასები, რაც აცივებას, ნალექს და ზოგან ძლიერ თოვლს გამოიწვევს.

სააგენტოში აცხადებენ, რომ 31 იანვრიდან ქვეყნის მთელ ტერიტორიაზე, განსაკუთრებით აღმოსავლეთ საქართველოში, ჰაერის ტემპერატურა არსებულთან შედარებით შესაძლებელია 10 გრადუსით დაეცეს.

ამასთან, თებერვლის დასაწყისში კიდევ უფრო აცივდება, ჰაერის ტემპერატურა შესაძლებელია აღმოსავლეთ საქართველოს ბარში -10, -15, ხოლო მთაში -17,-22 გრადუსამდე დაეცეს. მოსალოდნელია გზებზე ლიპყინული.

სააგენტოს ინფორმაციით, აღნიშნული ხასიათის მოვლენა წლის ამ პერიოდისთვის იშვიათია, მაგრამ არ განეკუთვნება ანომალურ კატეგორიას. ამინდის ანალოგიური პირობები თებერვლის თვეში 1970 - 1990-იან წლებში 5-ჯერ, 2000-იან წლებში 3-ჯერ, ხოლო ახლო წარსულში 2012 წელს დაფიქსირდა.

http://www.newspress.ge/sazogadoeba/36092-khvalidan-amindi-gauaresdeba.html