პარლამენტის საგარეო ურთიერთობათა კომიტეტის თავმჯდომარის, თედო ჯაფარიძის განცხადებით, საქართველოს დელეგაციის მიერ ეუთოს საპარლამენტო ასამბლეისთვის წარდგენილ რეზოლუციის პროექტში ყველა ის მწვავე საკითხია შეტანილი, რომელიც დაკავშირებულია რუსეთთან ურთიერთობებთან.

როგორც დელეგაციის წევრმა, თედო ჯაფარიძემ ჟურნალისტებს განუცხადა, საკითხები პირველ რიგში ეხება 2008 წლის ომს, ოკუპირებულ ტერიტორიებს, იძულებით გადაადგილებულ პირებს, მკვლელობებს და გატაცებებს.

მან ასევე აღნიშნა, რომ დელეგატთა უმრავლესობა საქართველოს რეზოლუციას მხარს უჭერს.

„ჩვენ ვხვდებით დელეგაციებს და კულუარული ინფორმაციით ვიცი, რომ დელეგატთა უმრავლესობა ჩვენს რეზოლუციას მხარს უჭერს. დაველოდოთ, როგორ გაიმართება დებატები. ჩვენი რუსი კოლეგები სიურპრიზების მომზადებაში გაწაფული არიან, რაც კიდეც შემოგვითვალეს ამ რამდენიმე ხნის წინ“, - განაცხადა ჯაფარიძემ.

რაც შეეხება კითხვას, თუ რას დაუპირისპირებს რუსი კოლეგების პოზიციას იმასთან დაკავშირებით, რომ არ არსებობს ოკუპირებული ტერიტორიები და ამ საკითხთან მიმართებით რუსეთის მხრიდან ყველა შეთანხმება დაცულია, ჯაფარიძემ განამრტა, რომ ამგვარი არგუმენტები რუსეთის დელეგაციის წევრებს ხშირად უთქვამთ.

„დღეს კვირა დღეა და შეიძლება გარკვეული დოზით იუმორს მივმართოთ. გუშინ მშვენიერი საღამო იყო და ეტყობა მათ კარგად იქეიფეს და რაღაც ილუზიები გაუჩნდათ ან პირიქით, თავი სტკივათ. დიდი ხანია ამ პროცესში ვარ ჩართული და ეს ყველაფერი არახალია - ამგვარი არგუმენტები რუსეთის დელეგაციის წევრების მხრიდან არაერთხელ გვაქვს მოსმენილი. მთავარია, რომ ჩვენი არგუმენტები არის მყარი, არის ძალიან ხისტი და არ ვაპირებთ ერთი იოტის, ერთი სანტიმეტრის დათმობას“, - განაცხადა ჯაფარიძემ.

საქართველოს რეზოლუციის პროექტის განხილვა ხვალ გაიმართება.