ამერიკის შეერთებული შტატების სახელმწიფო დეპარტამენტი საქართველოსთან დღეს გაფორმებული მემორანდუმების შესახებ ინფორმაციას  აქვეყნებს.

დღეს საქართველოს პრემიერ-მინისტრმა, გიორგი კვირიკაშვილმა და აშშ-ის სახელმწიფო მდივანმა, ჯონ ქერიმ ხელი მოაწერეს თავდაცვისა და უსაფრთხოების სფეროში პარტნიორობის გაღრმავების შესახებ მემორანდუმს და ასევე,  ფულბრაიტის აკადემიური გაცვლითი პროგრამის მიმართულებით საქართველოსა და აშშ-ს შორის საგანმანათლებლო თანამშრომლობის მემორანდუმს.

„საქართველოსა და ამერიკის შეერთებულ შტატებს შორის თავდაცვისა და უსაფრთხოების სფეროში პარტნიორობის გაღრმავების შესახებ მემორანდუმის მიხედვით,  საქართველო-აშშ-ის სტრატეგიული პარტნიორობის კომისია, რომელიც 2009 წელს დაარსდა, ცდილობს გააღრმავოს ორმხრივი თანამშრომლობა ქვეყნებს შორის დემოკრატიისა და მმართველობის; თავდაცვისა და უსაფრთხოების; ეკონომიკის, ენერგეტიკის და ვაჭრობის; ხალხთაშორის და კულტურული ურთიერთგაცვლის მიმართულებებით.

ეს მემორანდუმი კიდევ ერთხელ ადასტურებს და განავრცობს ორმხრივ თავდაცვით და უსაფრთხოებით თანამშრომლობას ისეთ სფეროებში როგორიც არის: თავდაცვისუნარიანობის მშენებლობა, სამხედრო და უსაფრთხოების თანამშრომლობა და ინფორმაციის გაზიარება.

ჯონ ქერიმ ასევე 15 მილიონი აშშ დოლარის ღირებულების 5-წლიანი პროგრამის შესახებ განაცხადა, რომელსაც აშშ-ის საერთაშორისო განვითარების სააგენტო (USAID) განახორციელებს.  ეს პროგრამა განავითარებს ქართველი ბიზნესმენების უნარებს და სოფლების მცხოვრებთათვის შემოსავალს გააუმჯობესებს. ამ  პროგრამით ძირითადად ისარგებლებენ ეთნიკური და რელიგიური უმცირესობები, ისევე როგორც  აფხაზეთის და  სამხრეთ ოსეთის ადმინისტრაციულ საზღვრებთან სიახლოვეს მცხოვრები ადამიანები.

მდივანმა ქერიმ ასევე განაცხადა, რომ აშშ-ის შრომის დეპარტამენტიდან გამოიყოფა ერთი მილიონი აშშ დოლარი, შრომის საერთაშორისო ორგანიზაციის პროგრამისთვის, რომელიც გააუმჯობესებს საქართველოს მთავრობის შესაძლებლობას გააძლიეროს შრომითი კანონმდებლობა. ეს დაფინანსება დაემატება აშშ-ის მიერ უკვე გამოყოფილ ორ მილიონ დოლარს.

რაც შეეხება ფულბრაიტის აკადემიური გაცვლითი პროგრამის მიმართულებით საქართველოსა და აშშ-ს შორის საგანმანათლებლო თანამშრომლობის მემორანდუმს,  აშშ-ის მთავრობამ ამ პროგრამის ფარგლებში 3 სტუდენტი დააფინანსა 2016-ში, ახალი შეთანხმების თანახმად კი გაორმაგდება იმ ქართველი სტუდენტების რაოდენობა, რომლებიც ფულბრაიტის სტიპენდიით მიიღებენ განათლებას აშშ-ში“,-ნათქვამია აშშ-ის სახელმწიფო დეპარტამენტის მიერ გავრცელებულ ინფორმაციაში.