„2016 წელს, ქობულეთის სასმელი წყლის სრული გამრიცხველიანება მოხდება. მოსახლეობისთვის აღრიცხვის კვანძების მოწყობა, მობინადრეთა ინდივიდუალური გამრიცხველიანება შეამცირებს წყლის დანაკარგებს და ქალაქის მცხოვრებთა მხრიდან სასმელი წყლის უფრო რაციონალურ დახარჯვას განაპირობებს“ - განაცხადა guardian.ge-სთან საუბრისას შპს „ქობულეთის წყლის“ ტექნიკური განყოფილების უფროსმა, ზურაბ ბაჯელიძემ.

ბაჯელიძის ცნობით, ქობულეთში სასმელი წყლის გამრიცხველიანების პროცესი ძირითადად დასრულებულია და დარჩენილია მხოლოდ თამარ მეფის ქუჩა, სადაც ამჟამად წყლის ძველი მილებია, წყალგაყვანილობის რეაბილიტაციის შემდეგ კი ქუჩის გამრიცხველიანებაც მოხდება, რის საფასურსაც თავად მოსახელობა გადაიხდის. თანხა 500–650 ლარს შეადგენს.

„ქობულეთში თითქმის ყველა აბონენტი გამრიცხველიანებულია, თამარ მეფის ქუჩის გამოკლებით, სადაც მუნიციპალიტეტის გამგეობა ოქტომბრის თვეში გეგმავს წყლის სისტემის შეცვლას და ამის მერე მოგვეცემა საშუალება, რომ დავაერთოთ აბონენტები ქსელზე, ეს კი ნიშნავს იმას, რომ მიმდინარე წელს ქობულეთი სრულად გამრიცხველიანდება.

რაც შეეხება დაზიანებებს, წელს 112 დაზიანება აღმოიფხვრა სრულად, შარშან კი 240. შპს „ქობულეთის წყალი“ სრული დატვირთვით მუშაობს იმისთვის, რომ ნებისმიერი პრობლემა, რომელიც შეექმნება აბონენტს, დროულად იქნას მოგვარებული. ამ წუთებშიც ჩვენ სანიაღვრე სისტემის მომსახურებას ვახორციელებთ“, - განუცხადა ზურაბ ბაჯელიძემ guardian.ge-ს.