ხაშურის მუნიციპალიტეტის მაჟორიტარმა დეპუტატმა, ვალერი გელაშვილმა guardian.ge-სთან საუბრისას დაადასტურა, რომ „ქართული ოცნებიდან“ ხაშურის საარჩევნო ოლქში მაჟორიტარობის კანდიდატად კვლავ მისი წარდგენა იგეგმება.

„ჩემთვის ცნობილია, რომ „ქართული ოცნება“ ხაშურის მაჟორიტარი დეპუტატობის კანდიდატად მე წარმადგენს. როგორც ვიცი, სხვა კანდიდატურებიც განიხილებოდა, თუმცა, საბოლოოდ ჩემი წარდგენა გადაწყდა - მე ასეთი ინფორმაცია მაქვს. ოფიციალური წარდგენა როდის მოხდება ჯერ არ ვიცი“.

კითხვაზე, ჰქონდა თუ არა აღნიშნულ საკითხზე კონსულტაცია პარტიის ხელმძღვანელ პირებთან, გელაშვილმა უპასუხა, რომ პრემიერ მინისტრთან კონსულტაციებს ამ დღეებში გეგმავს.

„პრემიერი დაკავებულია მნიშვნელოვანი ვიზიტებით, თუმცა, რომ მოიცლის გვექნება საუბარი. ვგეგმავ, რომ მუნიციპალიტეტს საკუთარი და სახელმწიფოს ძალებით დავეხმარო“, - აღნიშნა guardian.ge-სთან საუბრისას ვალერი გელაშვილმა.

2012 წლის საპარლამენტო არჩევნებზე ვალერი გელაშვილი ხაშურის ოლქში მაჟორიტარი დეპუტატობის კანდიდატად კოალიცია "ქართულმა ოცნებამ", თავად მისმა მაშინდელმა ლიდერმა, ბიძინა ივანიშვილმა წარადგინა. გელაშვილმა მისი მთავარი მოწინააღმდეგე, "ნაციონალური მოძრაობის" სახელისუფლებო კანდიდატი დაამარცხა და პარლამენტის წევრი გახდა.