„რესპუბლიკური პარტიის“ ერთ-ერთი წევრი, პარლამენტის საფინანსო-საბიუჯეტო კომიტეტის თავმჯდომარის პირველი მოადგილე ნოდარ ებანოიძე არ გამორიცხავს, რომ 2016 წლის 8 ოქტომბერს დაგეგმილ საპარლამენტო არჩევნებში კენჭი იყაროს ხარაგაული-ბაღდათის გაერთიანებულ მაჟორიტარულ საარჩევნო ოლქში.

მისი თქმით, აღნიშნულ გადაწყვეტილებას პარტიის ეროვნული კომიტეტი იღებს.

„შესაძლოა,  სადაც  ვიყავი, ისევ იქ  ვიყარო კენჭი. სავარაუდოდ, ჩემი კანდიდატურა ხარაგაული-ბაღდათის ოლქში განიხილება. ამ გადაწყვეტილებას ეროვნული კომიტეტი იღებს“,-განაცხადა ებანოიძემ guardian.ge-სთან საუბრისას.

მან ასევე აღნიშნა, რომ ჯერჯერობით უცნობია როდის წარადგენს „რესპუბლიკური პარტია“ საარჩევნო სიას.

„შესაძლოა, ამ თვის ბოლოს დამტკიცდეს სია, შესაძლოა – არა“,-განაცხადა მან.

ნოდარ ებანოიძე ამჟამად ხარაგაულის მაჟორიტარი დეპუტატია. მან 2012 წლის საპარლამენტო არჩევნებში კოალიცია „ქართული ოცნებიდან“ იყარა კენჭი და „ნაციონალური მოძრაობიდან“ წარდგენილი მთავარი კონკურენტის დამარცხების შემდეგ საქმიანობა პარლამენტში განაგრძო. ხარაგაულის მოქმედ დეპუტატს კენჭისყრის შესახებ გადაწყვეტილების მიღების შემდეგ უკვე ხარაგაულისა და ბაღდათის გაერთიანებულ საარჩევნო ოლქში ოპოზიციონერის რანგში მოუწევს საარჩევნო კამპანიის გამართვა, რადგან კოალიცია „ქართული ოცნება“ დაშლილია და „რესპუბლიკელები“ იქ მხოლოდ ფორმალურად, მინისტრების პოსტების დატოვებამდე რჩებიან.