ბიზნესმენი ვახტანგ რჩეულიშვილი მისი შვილის, გუკა რჩეულიშვილის დაკავების შესახებ მიმდინარე ღონისძიებებს საეჭვოს უწოდებს და პროკურატურის გააქტიურებას საქართველოს ყოფილ მთავარ პროკურორის, არჩილ კბილაშვილის პირად ინტერესებს უკავშირებს.

„ჩემთვის ცოტა საეჭვო ვითარებაა, რადგან თუ დაკავება უნდოდათ, პროცესი 2 წელია მიმდინარეობს და კაციშვილს არ დაუკითხავს. „ცენტრ პოინტის“საქმის გამოძიებით ჩვენც დაინტერესებული ვართ. ერთი თვის წინ ჩვენ მივმართეთ პროკურატურას, რომ ყველაფერს - ამ პროვოკაციას „ცენტრ პოინტის“ წინააღმდეგ ამტკიცებს ის, რომ არჩილ კბილაშვილი, ვინც გასცა ეს ორდერი და სანქცია, იყო „ცენტრ პოინტის“ საქმიანი პარტნიორი. ამას მოჰყვა ის, რომ არჩილ კბილაშვილმა მოაწერა ხელი სანქციას რუსუდანის და მაიას წინააღმდეგ, რაც ჩვენ გავასაჩივრეთ, რასაც მოჰყვა გაძლიერება 30 კაცამდე პროკურატურის ბრიგადის“, - განაცხადა ვახტანგ რჩეულიშვილი.

„რუსთავი 2“-ის ცნობით, სამართალდამცველები ამ წუთებში გუკა რჩეულიშვილის დაკავების სპეცოპერაციას აწარმოებენ. გუკა რჩეულიშვილის დედის, მაია რჩეულიშვილის ინფორმაციით, უკვე დაკავებულია კომპანიის ორი თანამშრომელი - სალომე ჩარკვიანი და ირაკლი მინდელი და ასევე, დაკავების ორდერია გაცემული მისი შვილის - გუკა რჩეულიშვილის მიმართ. 

მთავარი პროკურატურის საზოგადოებასთან ურთიერთობის სამსახურის უფროსის, ნათია სუხიაშვილის განაცხადებით, ქვეყნის მთავარი საგამოძიებო უწყება „ცენტრ-პოინტის“ ორი თანამშრომლის სალომე ჩარკვიანისა და ირაკლი მინდელის დაკავების მიზეზებსა და საქმის მიმდინარეობის შესახებ ინფორმაციას ხვალ გაავრცელებს. 

მთავარ პროკურატურაში სამშენებლო კომპანია „ცენტრ პოინტის“ წარმომადგენლების მიერ განხორციელებულ სავარაუდო თაღლითობის ფაქტზე  გამოძიება 2012 წლის საპარლამენტო არჩევნების შემდეგ დაიწყო.