თერჯოლის მუნიციპალიტეტის გამგებელი თეიმურაზ ჯაფარიძე სოფ. ძევრის საჯარო სკოლაში გახსნილ ინგლისურენოვან საზაფხულო ბანაკს ეწვია და ბანაკის მონაწილეების მიერ გამართულ კონცერტს დაესწრო. ამის შესახებ guardian.ge–ს თერჯოლის მუნიციპალიტეტიდან აცნობეს.

"კარგია, რომ აქ იკრიბებიან საქართველოს სხვადასხვა მუნიციპალიტეტიდან ჩამოსული ახალგაზრდები, მათ შორის აზერბაიჯანული სკოლიდან. ბავშვობიდან დაწყებული ურთიერთობა საუკეთესო მეგობრობად ჩამოყალიბდება და ჩვენი ქვეყნის უკეთესი მომავლის საწინდარია,“-აღნიშნა თეიმურაზ ჯაფარიძემ.

„მაკლეინის ორგანიზაცია ბავშვებისათვის“ და რეგიონული განვითარების ფონდის მხარდაჭერით, ინგლისურენოვანი საზაფხულო ბანაკი უკვე მე-5 წელია წარმატებით ფუნქციონირებს.

ინტელექტუალური თამაშებითა და სპორტული შეჯიბრებებით დატვირთული ბანაკი საქართველოს სხვადასხვა რეგიონიდან ჩამოსულ მოსწავლეებს მასპინძლობს. ,,მაკლეინის ორგანიზაცია ბავშვებისათვის“ ძევრის სკოლასთან აქტიურად თანამშრომლობს და მას დაფინანსებასაც უწევს. სკოლისა და ორგანიზაციის ერთობლივი თანამშრომლობით განხორციელებულ პროექტებს შორისაა ზამთრის და ზაფხულის ინგლისურენოვანი ბანაკების მოწყობა.

ორგანიზაცია ასევე კურირებს საქართველოს სხვადასხვა რეგიონში რამდენიმე სკოლას, რომლის ფარგლებშიც სრულად ფარავს ამ სკოლების წარმატებული მოსწავლეების უნივერსიტეტში სწავლის ხარჯებს და უზრუნველყოფს მათ მატერიალურ-ტექნიკური ბაზით. ასევე, მაკლეინის ორგანიზაციისა და ბეისბოლის ფედერაციის მჭირდო თანამშრომლობის საფუძველზე, აქტიურად მიმდინარეობს სკოლებში ამ სპორტის პოპულარიზაცია.

"მაკლეინის ორგანიზაცია ბავშვებისათვის“ აქტიურად მუშაობს ინკლუზიური განათლების მიმართულებით და ასევე, განათლების სამინისტროსთან გაფორმებული ხელშეკრულების საფუძველზე, თერჯოლის მუნიციპალიტეტის სოფელ ძევრისა და ბოლნისის მუნიციპალიტეტის სოფელ ნახიდურის აზერბაიჯანულ სკოლას შორის 2014 სასწავლო წელს მეგობრულ-საქმიანი თანამშრომლობა დაიწყო.

ძევრის სკოლის დირექტორის მანუჩარ ფანჩულიძის თქმით, ბანაკების დანიშნულება ბავშვების ლიდერებად გაზრდაა, რათა შემდეგ თავიანთ სკოლებშიც განახორციელონ სხვადასხვა პროექტები. საზაფხულო ბანაკი-ძევრი დღეს დაიხურება.