მიმდინარე წლის 1 მარტიდან, თბილისში, იურიდიული პირებისთვის გაზის ტარიფი 15 თეთრით გაძვირდება.

“ყაზტრანსგაზ-თბილისის” საზოგადოებასთან ურთიერთობის სამსახურის უფროსის ეკა სარიას განცხადებით, 2015 წლის 1 მარტიდან, თბილისში, იურიდიული პირებისთვის გაზის ტარიფი 15 თეთრით გაძვირდება.

მისივე თქმით, დღევანდელი მდგომარეობით, 1 კუბური მეტრი გაზის ტარიფი 75 თეთრს შეადგენს და 1 მარტიდან იურიდიული პირებისთვის 90 თეთრი გახდება.

“გაზს მომწოდებლისგან დოლარის კურსის შესაბამისად ვყიდულობთ და ვყიდით ლარში, იძულებულნი გავხდით, კურსის ცვლილების გამო, ტარიფი 15 თეთრით გაგვეზარდა, ოღონდ მხოლოდ იურიდიული პირებისთვის, ცვლილება ძალაში შედის 1 მარტიდან. ჩვენ შესაბამისი შეტყობინებები უკვე დავუგზავნეთ ყველა იურიდიულ პირს“, -აღნიშნა სარიამ.