მოვუწოდებთ საქართველოს უზენაეს სასამართლოს, ნუ გახდება დაკვეთის შემსრულებელი ისე, როგორც მისი წინამორბედი ორი ინსტანცია, - აღნიშნული განცხადება ტელეკომპანია „რუსთავი 2“-ის გენერალურმა დირექტორმა, ნიკა გვარამიამ საგანგებო ბრიფინგზე გააკეთა.

გვარამიას თქმით, „რუსთავი 2“-მა გუშინ ფოსტის საშუალებით ჩააბარა საკასაციო საჩივარი „სრული რწმენით იმისა, რომ პირველი-ორი ინსტანციის გადაწყვეტილება არის აბოსულუტურად უკანონო, აბსოლუტურად დაუსაბუთებელი და არაფერი აქვს საერთო სამართლიან სასამართლოსთან“.

„ჩვენ დღეს „რუსთავი 2“-ის კოლექტივი, გუნდი, ერთიანი გუნდი, რომელშიც ბზარის შეტანა ვერ მოხერხდა და ვერ მოხერხდება, შევიკრიბეთ იმისათვის, რომ მივმართოთ საქართველოს უზენაეს სასამართლოს....

ორივე ინსტანციაში ჩვენი პრაქტიკულად ყველა საპროცესო უფლება იქნა დარღვეული. ამის ლოგიკური შედეგი იყო ორივე ინსტანციის სრულიად უკანონო გადაწყვეტილება, რაც ეფუძნება არამხოლოდ პროცესუალურ დარღვევებს, არამედ შინაარსობრივ უსწორობასა და უკანონობას. გადაწყვეტილება არის თავისი უკანონობის მასშტაბით უპრეცედენტო. შესაბამისად, იგი აკმაყოფილებს საკასაციო საჩივრის დასაშვებობის ყველა კანონით გათვალისწინებულ კრიტერიუმებს. ამიტომაც მოვუწოდებთ საქართველოს უზენაეს სასამართლოს, გადაარჩინოს ქვეყანაში დემოკრატია, გადაარჩინოს ქვეყანაში სიტყვისა და გამოხატვის თავისუფლება და რაც მთავარია, გადაარჩინოს ქვეყანაში მართლმსაჯულებისა და საერთო სასამართლოების სისტემის რეპუტაცია, რომელიც მიწასთან გაასწორა პირველმა-ორმა ინსტანციამ. ეს მათ მოახერხეს ერთადერთი სამოქალაქო სამართლებრივი საქმის ფარგლებში. საქმისა, რომელსაც „რუსთავი 2“-ის საქმე ჰქვია“, - განაცხადა ნიკა გვარამიამ.

ბრიფინგი სამაუწყებლო კომპანიის ცენტრალური შენობის ეზოში თანამშრომლებთან ერთად გაიმართა.