„დემოკრატიული მოძრაობის“ ლიდერის, ნინო ბურჯანაძის განცხადებით, უცხოეთში განათლების მიღება არ შეიძლება იყოს „ქართული ოცნების“ საარჩევნო სიის წევრების შეფასების ერთადერთი კრიტერიუმი.

მისი თქმითვე, პრინციპული მნიშვნელობა არა აქვს, ვინ იქნება სიაში, რადგან „ქართულ ოცნებაში“ გადაწყვეტილების მიღების ფორმა ყველასთვის ცნობილია.

„კარგია კარგ განათლებამიღებული ახალგაზრდები. მაგრამ ერთადერთი კრიტერიუმი არ შეიძლება იყოს უცხოეთში განათლების მიღება იმიტომ, რომ პოლიტიკაში მარტო ეს კრიტერიუმი არ მუშაობს. ნებისმიერ ქართველ ახალგაზრდას ვუსურვებ წარმატებას, თუმცა, „ქართული ოცნების“ იმედი მაქვს მეთქი, რომ გითხრათ, ნამდვილად არა იმიტომ, რომ რეალურად მაინც არაფერი არ იცვლება. ჩვენ ვიცით, გადაწყვეტილების მიღება როგორ ხდება „ქართულ ოცნებაში“, ამიტომ ვინ იქნება სიაში, ამას პრინციპული მნიშვნელობა არ აქვს“, - განაცხადა ნინო ბურჯანაძემ.

პრემიერ-მინისტრმა, გიორგი კვირიკაშვილმა საგურამოში ილია ჭავჭავაძის სახელობის სახლ–მუზეუმის ეზოში "ქართული ოცნების" საარჩევნო სიის წარმომადგენლები დაასახელა.  "ქართული ოცნების" საარჩევნო სიის ნაწილი  ასე გამოიყურება:   თამარ ჩუგოშვილი, გიორგი გახარია, ირაკლი კობახიძე, აკაკი ზოიძე, არჩილ თალაკვაძე, თამარ ხულორდავა, ირინა ფრუიძე, კახა კუჭავა, მამუკა მდინარაძე, მარიამ ჯაში, ნინო გოგუაძე (კონსერვატიული პარტია), რომან კაკულია, სოფო კილაძე, სოფო ქაცარავა, სოფო ჯაფარიძე.  გიორგი კვირიკაშვილმა მათი წარდგენისას განაცხადა, რომ დასახელებულ კანდიდატთაგან უმრავლესობას დასავლური განათლება აქვს მიღებული.