საგურამოში, ილია ჭავჭავაძის სახელობის სახლ-მუზეუმის ეზოში საქართველოს პრემიერ მინისტრის, გიორგი კვირიკაშვილის მიერ „ქართული ოცნება - დემოკრატიული საქართველოს“ საარჩევნო სიის 15 ახალი სახის წარდგენას guardian.ge-სთან საუბარში, პოლიტოლოგი, გია ხუხაშვილი აფასებს. იგი „ქართული ოცნების“ დღეს წარმოდგენილ ახალ სახეებს „ღრმა ზურგიდან პირდაპირ ფრონტის ხაზზე გაშვებულ მეომრებად“ აღიქვამს და ფიქრობს, რომ მათი ორი პარამეტრით - ცნობადობის ინდექსითა და დებატების წარმოების უნარით - მათივე ერთ-ერთი მთავარი ოპონენტის, „ნაციონალური მოძრაობის“ საარჩევნო სიის პირველ ათეულთან შედარება, ამ უკანასკნელს აბსოლუტურად მომგებიან პოზიციაში აყენებს, უფრო ზუსტად კი, ხუხაშვილისთვის ეს, „ნაციონალური მოძრაობის“ მხრიდან 10-0-ის მოგებას ნიშნავს.

„უარყოფითი ემოციები არ მაქვს, ახალგაზრდები არიან და ახლა იწყებენ პოლიტიკურ ცხოვრებას და მე ვუსურვებ მათ წარმატებებს. თუმცა, თვითონ „ქართული ოცნების“ ეს პოზიცია წმინდა პოლიტ-ტექნოლოგიური თვალსაზრისით რომ შევაფასოთ, საკმაოდ უხარისხოდ გამოიყურება იმიტომ, რომ ღრმა ზურგიდან პირდაპირ ფრონტის ხაზზე გაშვებული მეომარი ვერ იბრძოლებს სრულფასოვნად. პოლიტიკაში ადამიანის ინტეგრაცია როგორ ხდება - ჯერ არის პირველი ეტაპი, მისი ცნობადობის გაზრდა, მეორე ეტაპი კი გახლავთ საზოგადოებასთან კომუნიკაციის გამოცდილება, პოლიტიკური დებატების წარმოების ინდექსი. ამ ყველაფერს სჭირდება დიდი პრაქტიკა. ამ ადამიანებს ეს ყველაფერი არ გააჩნიათ. პირდაპირ წინასაარჩევნო კამპანიაში მათი ინტეგრაცია, მათ აყენებს ძალიან რთულ მდგომარეობაში ოპონენტებთან.

„ქართული ოცნების“ მიერ წარდგენილი 15 ადამიანის სია ამ ორი პარამეტრით (ცნობადობის ინდექსი და დებატების წარმოების უნარი) რომ შევადაროთ „ნაციონალური მოძრაობის“ ათეულს - ე.წ. ახალ სახეებს, 10-0-ს იგებს „ნაციონალური მოძრაობა“. ამ პარტიის ათეულიდან ყველას აქვს მაღალი ცნობადობა და ძალიან დიდი გამოცდილება მედიასთან ურთიერთობისა და საჯარო სივრცეში აქტიური მოქმედებების და ა.შ. შესაბამისად, „ქართული ოცნების“ მიერ წარდგენილ ამ სახეებს რომ მოუწევთ დებატებში მონაწილეობა, ბუნებრივია, მათ შანსი არ აქვთ. ერთადერთი უნდა იძახონ სისხლიანი 9 წელი, მაგრამ სხვა არგუმენტის თქმას ვერ მოახერხებენ. ეს კი მათ აყენებს ძალიან რთულ მდგომარეობაში.

„თუ „ქართულ ოცნებას“ უნდოდა ახალი სახეების გამოყვანა, მათ უნდა ეზრუნათ დღემდე და უნდა ეზრუნათ ამ ადამიანების ცნობადობის ფორმირებაზე, რომ საზოგადოებას სცოდნოდა ვინ არიან ეს ადამიანები. გარდა ამისა, პარტიას დიდი ხნით ადრე უნდა დაეწყო მათი ინტეგრაცია საჯარო სივრცეში. არც ერთი და არც მეორე არ გაკეთდა. ფაქტობრივად, ეს ადამიანები რომლებიც, ფიგურალურად ვამბობ ამას, ზურგიდან პირდაპირ ფრონტის ხაზზე გაუშვეს ისე, რომ არც სროლა ასწავლეს, არც ფორმა ჩააცვეს, არც ბრძოლის ტაქტიკა ასწავლეს და არც ის აუხსნეს რომ, იქედან ტანკი რომ წამოვიდეს და გესროლოს, რა უნდა გააკეთო. არაფერი აუხსნეს და პირდაპირ დესანტად გადასხეს მტრის ზურგში. ეს ღრმა არაპროფესიონალიზმია, დამეთანხმებით. თუმცა, „ქართული ოცნებისგან“ მე ეს არ მიკვირს იმიტომ, რომ „ქართულ ოცნებაში“, სამწუხაროდ, გადაწყვეტილების მიმღებ ცენტრში, მე პოლიტიკური აზროვნების, პოლიტიკური ანალიზის სიმპტომებსაც კი ვერ ვხედავ. ყველაფერს უკუღმა აკეთებენ და ეს რატომ უნდა გაეკეთებინათ სწორად? ასე რომ, კანონზომიერია ყველაფერი“, - განაცხადა გია ხუხაშვილმა.

შეკითხვაზე - ხომ არ ფიქრობთ, რომ „ქართული ოცნების“ მიერ ახალი სახეების წარდგენა პარტიის ერთგვარ ტაქტიკას წარმოადგენს და მომავალში დასახელებული კანდიდატების დიდი ნაწილი შესაძლოა, რომ ისევ ძველი სახეები იყვნენ? - ხუხაშვილი პასუხობს:

„მე გეტყვით ამის შემდეგ რაც მოხდება. ახლა შეეცდებიან ამ ადამიანების საჯარო სივრცეში ინტეგრაციას. საბოლოო ჯამში, ეს ყველაფერი დამთავრდება, გამოუცდელობის გამო, ე.წ. კოღუაშვილის სინდრომით. თითო-თითო სისულელეს იტყვიან რაღაცას და მოუწევთ გაჩერება. წინა პლანზე წამოვლენ ისევ „ქართული ოცნების“ ძველი სპიკერები. ამით დასრულდება ყველაფერი. ფაქტობრივად, ეს ძალისხმევა, ტაშ-ფანდური წყალში გადაყრილი გამოვა საბოლოო ჯამში“, -აღნიშნა გია ხუხაშვილმა.

Guardian.ge-ს მორიგ შეკითხვას - პრემიერ მინისტრმა 15 კანდიდატის წარდგენისას, ხაზი გაუსვა მათი ნაწილის დასავლურ განათლებას. თქვენი აზრით, ეს ხომ არ იქნება ერთ-ერთი მნიშვნელოვანი ფაქტორი ამომრჩეველში „ქართულ ოცნებისადმი“ ნდობის ამაღლების კუთხით? - პოლიტოლოგი პასუხობს, რომ ეს „ერთჯერადი მოხმარების პროდუქტია“ და აღნიშნული რამ შესაძლებელი იქნებოდა იმ შემთხვევაში, თუ „ქართული ოცნება“ პოლიტიკურ ველზე „შემოიყვანდა ან გადაიბირებდა ბრენდირებულ ფიგურებს“.

„საქართველოში მე მგონი აღარ დარჩა ახალგაზრდა, რომელსაც სამთვიანი ან ერთწლიანი სერტიფიკატი არ აეღო რომელიმე საერთაშორისო ინსტიტუტის. აქ ხომ არ არის ლაპარაკი სრულფასოვან განათლებაზე. იგივე ჩუგოშვილი ერთი წლით იყო წასული. თუმცა, ამაშიც არ არის საქმე. კი ბატონო, განათლება გავიგეთ, მაგრამ მერე რა?! ეს კარგია, მოგვეწონა, მაგრამ ეს ხომ ერთჯერადი მოხმარების პროდუქტია. როგორც კი ეს ადამიანები დებატებში დასხდებიან თბილისში განათლებამიღებულ რომელიმე სხვა პარტიის გამოცდილ სპიკერთან, წააგებენ. მერე სად მიდიან?

კი, თავისთავად რაღაც იმედი შემოდის, ცუდი არ არის ეს პროცესი, თუმცა, ამაზე ახლა რაღაც დიდი იმედების დამყარება... ეს შესაძლებელი იქნებოდა იმ შემთხვევაში თუ „ქართული ოცნება“ შემოიყვანდა ან გადაიბირებდა ბრენდირებულ ფიგურებს, პოლიტიკაში ან საზოგადოებრივ ცხოვრებაში ან რაიმე სხვა სფეროში, არ აქვს მნიშვნელობა, მაღალი ცნობადობის ადამიანებს - ასეთები არ ჰყავს. სანამ „ქართული ოცნების“ ახალი სახეების ცნობადობის აწევა მოხდება, მანამ არჩევნებიც მოვა და როდის აპირებენ ამას? დარწმუნებული ვარ, ახლა ნებისმიერი ადამიანი რომ გააჩერო თბილისის ქუჩებში, ერთს ვერ იპოვი, რომ ამ დასახელებული 15 კანდიდატის გვარებიდან დაახლოებით, 5-ის დასახელება მაინც შეძლოს. მათ ნულოვანი ცნობადობა აქვთ - ეს არის პრობლემა“, - განაცხადა გია ხუხაშვილმა.