ვახტანგ რჩეულიშვილი აცხადებს, რომ მის ოჯახზე ფართომასშტაბიანი ანგარიშსწორება ხორციელდება, მის მუღლეს, მაია რჩეულიშვილს კი ციხეში პატიმრები მიუგზავნეს, რის შესახებაც დეტალურ ინფორმაციას მას ადვოკატები მოგვიანებით მიაწვდიან. ამის თაობაზე ვახტანგ რჩეულიშვილმა გაზეთ "ახალი თაობისთვის" მიცემულ ინტერვიუში ისაუბრა. იგი ამბობს, რომ სალომე ჩარკვიანი სრულიად უდანაშაულოა და მისი დაკავება მაია რჩეულიშვილზე შანტაჟისთვის მოხდა.

"ძალადობაში ვგულისხმობ იმას, რომ მიუგზავნეს ვიღაც პატიმრები, რომ ჩვენ ბინა გვაქვს ნაყიდი, თქვენ არ აგვიშენეთ და მსგავსი რაღაცები. ანგარიშსწორება მიდის ოჯახზე ფართო მასშტაბით. ახლა ადვოკატები ნახავენ მაიას და ისინი კიდევ უფრო დეტალურ ინფორმაციას მომაწვდიან. მე ამ ინფორმაციებს აუცილებლად გადავამოწმებ. რასაკვირველია, სალომე ჩარკვიანი აბსოლუტურად უდანაშაულოა. სალომეს ხელი არაფერზე მიუწვდებოდა. ის იყო გაყიდვების მენეჯერი, ჩვენი პროექტის სახე. სალომე გამოიყენეს მაიაზე შანტაჟის იარაღად, დააკავეს მხოლოდ ამიტომ. მაიამაც განაცხადა, სალომე აბსოლუტურად უდანაშაულოაო. არანაირი გზა აღარ დატოვეს, ბავშვებიც დააპატიმრეს, სალომე გუკაზე პატარაა. ეს ყველაფერი კეთდება იმისთვის, რომ ცენტრ-პოინტის ქონება ხელში ჩაიგდონ, მიითვისონ არჩევნების წინ და გამოიყენონ თავისი საარჩევნო მიზნებისთვის. ქონებაზე გვითხრეს, რომ სასამართლომ ჩვენ მოგვაკუთვნა და ახლა ცდილობენ, რომ წაგვართვან ისევ. აი, ამიტომ ზის მაია. როგორც წინა ხელისუფლების დროს ხდებოდა წინასაარჩევნო კამპანიის დროს, ზუსტად იგივე მოხდა ამ ხელისუფლების დროს. ხელისუფლებას არ უნდა, რომ რეაბილიტაცია დაკავშირებული იყოს მაიას სახელთან. მაიას პრაქტიკულად დაამუშავებინეს, დაადებინეს გეგმა. ცენტრ-პოინტში გაწერილია ყველა კაპიკი და ვიცით, რა არის საჭირო დამთავრებისთვის. მხოლოდ და მხოლოდ ის 10 მილიონია საჭირო, რაც მთავრობას ჩვენი ვალი აქვს, ან მოსახლეობას, სულ ერთია, ვინ გადაიხდის. მთელი ოთხი წელი დაგვაკარგვინეს, ეს მხოლოდ მაგათი ბრალია და უნდათ ახლა ყველაფერი მაიას გადააბრალონ. მინიმალური დაფინანსება რომ მოეცათ, ორი წლის წინ იქნებოდა ჩაბარებული ყველა ჩვენი შენობა. წინასაარჩევნოდ ჩვენი ქონების გამოყენება და მითვისება უნდათ. ბრძოლა მიდის ცენტრ-პოინტზე", - აცხადებს ვახტანგ რჩეულიშვილი.