ბრედფორდის უნივერსიტეტის დოქტორის, აფშიმ შაჰის განცხადებით, არაჩვეულებრივი არაფერია იმაში, რომ ტერორისტულ თავდასხმაზე ე.წ. ისლამურმა სახელმწიფომ დაუყოვნებლივ არ იკისროს პასუხისმგებლობა. აღნიშნულ ინფორმაციას BBC ავრცელებს.

მან განაცხადა: "ჩვენ ვიცით, რომ "ისლამური სახელმწიფო" დიდი ზეწოლის ქვეშ იმყოფება, ჩვენ ვიცით, რომ ისინი კარგავენ ბევრ ტერიტორიას და ამის შედეგად, ისინი იატაკქვეშეთში გადადიან. მათ დაამტკიცეს, რომ  როგორც კი ისინი იატაკქვეშეთში გადადიან, შესაძლოა, უფრო სახიფათონი გახდნენ". 

ბრედფორდის უნივერსიტეტის დოქტორმა აღნიშნული განცხადება ნიცაში მომხდარ შეიარაღებულ თავდასხმასთან დაკავშირებით გააკეთა.

BBC ფრანგულ მედიაზე დაყრდნობით, წერს, რომ ნიცაში მომხდარი შეიარაღებული თავდასხმის შედეგად დაღუპულთა რიცხვი 84-მდე გაიზარდა. ამ დრომდე საავადმყოფოებში კრიტიკულ მდგომარეობაში 18 ადამიანი რჩება.

მამაკაცმა სატვირთო ავტომანქანა ნიცაში შეჯგუფებულ ხალხში, რომლებიც ბასტილიის დღისადმი მიძღვნილ ფეირვერკებს შესცქეროდა, სწრაფი სიჩქარით შეიყვანა.

მძღოლმა ასევე მოქალაქეებს ცეცხლი გაუხსნა. პოლიციამ იგი ადგილზევე მოკლა. "როიტერსის" ცნობით, თავდამსხმელის ვინაობა პოლიციისთვის ცნობილი იყო, მაგრამ სპეცსამსახურებისთვის - არა.

ოფიციალური პირების განცხადებით, სატვირთო ავტომანქანაში იარაღები და ტყვიები არის ნაპოვნი. ფრანგული მედიის ცნობით, თავდამსხმელი ტუნისური წარმომავლობის 31 წლის მამაკაცია.

საფრანგეთის პრეზიდენტი, ფრანსუა ოლანდი დღეს, ვიწრო შემადგენლობით ნიცაში მომხდარ თავდასხმასთან დაკავშირებით ეროვნული უშიშროების საბჭოს სხდომას მოიწვევს.

გამთენიამდე ერისადმი მიმართვაში ოლანდმა განაცხადა, რომ მას ეჭვი არ ეპარება იმაში, რომ ეს ტერორისტული აქტია. "საფრანგეთი ამ ახალი ტრაგედიის გამო დიდ მწუხარებაშია მოცული", – აღნიშნა მან. ოლანდმა შენიშნა, რომ მოკლულთა შორის ბავშვებიც არიან.

მან თავდასხმას, რომელიც საფრანგეთის მიერ 1789 წლის ბასტილიის ციხის რევოლუციის გზით აღების 237–ე წლისთავისადმი მიძღვნილ საზეიმო დღეს მოხდა, ფანატიკოსების მხრიდან თავისუფლებაზე თავდასხმა უწოდა.

მომხდარიდან 6 საათის გასვლის შემდეგ, პასუხისმგებლობა არც ერთ ტერორისტულ დაჯგუფებას არ აუღია.