ნიცას მერმა, ქრისტიან ესტროსიმ ადგილობრივ მედიას საფრანგეთში განუცხადა, რომ ნიცაში მომხდარი თავდასხმისას დაახლოებით 10 ბავშვი არის მოკლული. "ასოშეითედ პრესი" მერის განცხადებაზე დაყრდნობით ავრცელებს ინფორმაციას, რომ საფრანგეთმა ძალიან ფრთხილად უნდა იფიქროს თავდასხმების საპასუხო შემდგომ ნაბიჯებზე, რადგანაც წინა პასუხები არ იყო საკმარისი ხალხის დაცვის თვალსაზრისით.

ფრანგული გაზეთის, "ნიცა-მატინის" თანახმად, თავდასხმის შემდეგ ადგილობრივ ლენვალის საავადმყოფოში 54 ბავშვი არის მოთავსებული.

ბოლო ინფორმაციით, თავდასხმას 84 ადამიანის სიცოცხლე ემსხვერპლა, 18-ის მდგომარეობა კი ამ დრომდე კრიტიკულია.

ადგილობრივი დროით, 23:00 საათზე, მამაკაცმა სატვირთო ავტომანქანა ნიცაში შეჯგუფებულ ხალხში, რომლებიც ბასტილიის დღისადმი მიძღვნილ ფეირვერკებს შესცქეროდა, სწრაფი სიჩქარით შეიყვანა.

მძღოლმა ასევე მოქალაქეებს ცეცხლი გაუხსნა. პოლიციამ იგი ადგილზევე მოკლა.

"როიტერსის" ცნობით, თავდამსხმელის ვინაობა პოლიციისთვის ცნობილი იყო, მაგრამ სპეცსამსახურებისთვის - არა.

ოფიციალური პირების განცხადებით, სატვირთო ავტომანქანაში იარაღები, ტყვიები და ყუმბარმტყორცნები იპოვეს, თუმცა მოგვიანებით პოლიციამ განაცხადა, რომ ის ნამდვილი არ იყო. ფრანგული მედიის ცნობით, თავდამსხმელი ტუნისური წარმომავლობის 31 წლის ფრანგი მამაკაცია, რომელიც ადგილობრივი მკვიდრი იყო, თუმცა პოლიციას ჯერ ეს არ დაუდასტურებია.

მომხდარიდან 6 საათის გასვლის შემდეგ, შეიარაღებულ თავდასხმაზე პასუხისმგებლობა არც ერთ ტერორისტულ დაჯგუფებას არ აუღია.