„ვუსამძიმრებთ და ვიზიარებთ ფრანგი ხალხის ტკივილს ქართველი ხალხის სახელით მინდა მივუსამძიმრო ფრანგ ხალხს, მათ გვერდით ვდგავართ, ვგრძნობთ და ვიზიარებთ მათ ტკივილს“,-განაცხადა საქართველოს პრეზიდენტმა საფრანგეთის ქალაქ ნიცაში მომხდარი ტერორისტული აქტის შესახებ საკითხის კომენტირებისას.

მისი თქმით,  საქართველოს უშიშროების სამსახურები ეფექტურად მუშაობენ ამ მიმართულებით და კიდევ უფრო მეტად უნდა ამაღლდეს უსაფრთხოების ზომები ქვეყანაში.

„რაც შეეხება იმ პროცესს, რასაც ჰქვია გლობალური უსაფრთხოება და საქართველოს როლი. საქართველომ ძალიან ბევრი გააკეთა ამისთვის, ქართველი ჯარისკაცები ბატონები და ქალბატონები, რომლებიც მსახურობენ ცხელ წერტილებში ამისთვის თავის სიცოცხლეს დებენ. მე კიდევ ერთხელ მინდა მადლობა ვუთხრა მათ ამ გმირობისთვის. ეს მოვლენა ნიშნავს იმას, რომ ყველანი ძალიან ფრთხილად უნდა ვიყოთ და ბუნებრივია, უნდა ამაღლდეს უსაფრთხოების ზომები და საზოგადოება უნდა იყოს დეტალურად ინფორმირებული რა ვითარებაში როგორ მოიქცეს. სამართალდამცველებიც აქტიურად უნდა იყვნენ ჩართული. საქართველო ამ თვალსაზრისით არის სახელმწიფო, რომლის უშიშროების სამსახურები ძალიან ეფექტურად მუშაობენ ამ მიმართულებით და დარწმუნებული ვარ მომავალშიც გაგრძელდება ეფექტური მუშაობა“, - აღნიშნა საქართველოს პრეზიდენტმა.

საფრანგეთის ქალაქ ნიცაში მომხდარი შეიარაღებული თავდასხმის შედეგად დაღუპულთა რიცხვი 84-მდე გაიზარდა. აღნიშნულ ინფორმაციას BBC ფრანგულ მედიაზე დაყრდნობით ავრცელებს. ამ დრომდე საავადმყოფოებში კრიტიკულ მდგომარეობაში 18 ადამიანი რჩება. მამაკაცმა სატვირთო ავტომანქანა ნიცაში შეჯგუფულ ხალხში, რომლებიც ბასტილიის დღისადმი მიძღვნილ ფეირვერკებს შესცქეროდა, სწრაფი სიჩქარით შეიყვანა. მძღოლმა ასევე მოქალაქეებს ცეცხლი გაუხსნა. პოლიციამ იგი ადგილზევე მოკლა. "როიტერსის" ცნობით, თავდამსხმელის ვინაობა პოლიციისთვის ცნობილი იყო, მაგრამ სპეცსამსახურებისთვის - არა. ოფიციალური პირების განცხადებით, სატვირთო ავტომანქანაში იარაღები და ტყვიები არის ნაპოვნი. ფრანგული მედიის ცნობით, თავდამსხმელი ტუნისური წარმომავლობის 31 წლის მამაკაცია.