თურქეთში სამხედროების ქმედება „საგრძნობლად კარგად ორკესტრირებულ სამხედრო გადატრიალებას მიაგავს, რომლის სათავეში ჩანს რომ დგანან სამხედროების მნიშვნელოვანი სტრუქტურები და არამხოლოდ რამდენიმე პოლკოვნიკი, - განაცხადა "როიტერსთან" საუბრისას ევროკავშირის ერთ-ერთმა უმნიშვნელოვანესმა წყარომ, რომელიც მონიტორინგს ახორციელებს.

"ისინი აკონტროლებენ აეროპორტებს და მოსალოდნელია, რომ კონტროლი აიღონ სატელევიზიო სადგურებზეც. ისინი აკონტრლებენ სტამბულის რამდენიმე სტრატეგიულ წერტილს. ოპერაციის მასშტაბებიდან გამომდინარე, ძნელია წარმოიდგინო რომ სამხედროები ასე ადვილად შეჩერდნენ“, - აცხადებს ევროკავშირის წყარო.

ერთ-ერთი ევროპელი დიპლომატი თურქეთის ელჩთან ევროპის ერთ-ერთი ქვეყნის დედაქალაქში სადილობდა, როდესაც მობილურ ტელეფონზე შეტყობინება მოვიდა, რის გამოც სადილი სასწრაფო წესით შეწყდა "ნათელია, რომ ეს არ არის რაღაც მცირე ზომის სამხედრო გადატრიალება. თურქი ელჩი ნათლად ჩანდა რომ შოკირებული იყო და მიღებულ ინფორმაციას ძალიან სერიოზულად აღიქვამდა", - განუცხადა "როიტერსს" დიპლომატმა, რომელიც აღნიშნულ სადილს ესწრებოდა.

"ჩანს რომ დილით ამ ამბავს მასობრივი შედეგი ექნება თურქეთისთვის".

აშშ-ის სახელმწიფო მდივანმა, ჯონ ქერიმ და რუსეთის საგარეო საქმეთა მინისტრმა მოსკოვში მოლაპარაკებების დასრულების შემდეგ ერთობლივი განცხადება გააკეთეს. ორივე მხარემ იმედი გამოთქვა, რომ სისხლისღვრა თავიდან იქნება აცილებული. აშშ-ის სახელმწიფო დეპარტამენტმა თურქეთში მყოფ ამერიკელებს შინ დარჩენისკენ მოუწოდა. სხვა ქვეყნებმაც მსგავსი რჩევები მისცეს თავიანთ მოქალაქეებს.

მას შემდეგ, რაც თურქეთის შეიარაღებულმა სამხედრო ჯგუფმა განაცხადა, რომ ქვეყანაზე კონტროლი აიღო, ერდოღანმა თურქულ CNN-თან მობილური ტელეფონით საუბრისას აღნიშნა, რომ ქმედება არის „პარალელური სტრუქტურის“ მიერ განხორციელებული, რასაც საჭირო პასუხები გაეცემა.

წარსულში მან ეს ტერმინი გამოიყენა აშშ-ში ბაზირებული მუსლიმი სასულიერო პირის, ფეტულაჰ გულენის დახასიათებისას, რომელსაც არეულობების მოწყობაში სდებს ბრალს.

ერდოღანმა ხალხს ქუჩებში გამოსვლისა და ამბოხებისთვის წინააღმდეგობის გაწევისაკენ მოუწოდა. მან განაცხადა: დაჟინებით მოვუწოდებ თურქ ხალხს, თავი მოიყარონ საზოგადოებრივი თავშეყრის ადგილებსა და მოედნებზე, აეროპორტებში. არასოდეს არ მჯეროდა იმაზე დიდი ძალაუფლების, ვიდრე ეს ხალხის ძალაუფლებაა".

ერდოღანმა განაცხადა, რომ იგი ანკარისკენ მიემგზავრება და ისინი, ვინც სამხედრო გადატრიალებაში არიან ჩართულნი, მძიმე საფასურს გადაიხდიან. მისივე თქმით,უმცირესობის მიერ დაწყებულ ამბოხებას დაძლევს.

სამხედრო ჯგუფმა ეროვნული სამაუწყებლო კომპანია TRT-ის მეშვეობით განაცხადა, რომ დემოკრატიულ და სეკულარულ მმართველობას ახლანდელი მთავრობის მიერ ეროზია გაუჩნდა, ქვეყანას ახალი კონსტიტუცია ექნება.

თურქეთში ამ დროისთვის დაკეტილია ხიდები სტამბულში, მუშაობა შეწყვეტილი აქვს სტამბულის ათათურქის აეროპორტს, ხოლო სამხედრო თვითმფრინავები დედაქალაქ ანკარაში საკმაო დაბალ სიმაღლეზე დაფრინავენ.

BBC- ის ცნობით, სტამბულში გადაკეტილია ბოსფორისა და ფატიჰ სულთანის ხიდები.

BBC-ის ცნობითვე, თურქეთის დედაქალაქ ანკარაში ცეცხლსასროლი იარაღიდან ისვრიან, სროლის ხმა ისმის ასევე სტამბულის პოლიციის შენობასთან, აეროპორტის გარე პერიმეტრზე კი ტანკები არიან განლაგებული.