თურქი სასულიერო პირი ფეტჰულაჰ გიულენი თურქეთში სამხედრო გადატრიალების ორგანიზებაში მისი შესაძლო თანამონაწილეობის საკითხის გამოძიებას საერთაშორისო ორგანიზაციას სთხოვს.

გიულენის განმარტებით, თუ მას აღნიშნული მოვლენების ორგანიზებაში ადანაშაულებენ, საერთაშორისო ორგანიზაციას მოუწევს დაამტკიცოს, სახელმწიფო გადატრიალებაში მისი თანამონაწილეობა.

„საერთაშორისო კომისიამ გადატრიალების მცდელობა გამოიძიოს და შედეგი რაც არ უნდა იყოს, ვაღიარებ, თუნდაც ტყუილი იყოს, მაინც ვაღიარებ. მხოლოდ ვითხოვ, გამოძიება საერთაშორისო ორგანიზაციამ ჩაატაროს“, -განაცხადა გიულენმა ჟურნალისტებთან საუბრისას.

თურქეთის პრეზიდენტმა სამხედრო ამბოხების ინიციატორად ფეტჰულაჰ გიულენი გუშინ დაადანაშაულა და აშშ-ს მისი ექსტრადირებაც სთხოვა.  

„სამხედრო გადატრიალების მცდელობის შემდეგ მე მივმართავ შეერთებულ შტატებს, მივმართავ მათ ლიდერს, გადმოგვეცით ის, ვინც პენსილვანიაში იმყოფება. თუ ჩვენ სტრატეგიული პარტნიორები ვართ, თუ ვართ პარტნიორობის მაგალითი, გთხოვთ, შეასრულეთ თქვენი პარტნიორის მოთხოვნა, რადგან ჩვენ გადმოგეცით ყველა ტერორისტი, რომლებსაც თქვენ ითხოვდით“, -  განაცხადა ერდოღანმა სტამბულში ხელისუფლების მხარდამჭერთა აქციაზე, რომელიც მის რეზიდენციასთან გაიმართა. 

თურქეთში 15 ივლისს სამხედრო გადატრიალების მცდელობა იყო, თუმცა თურქეთის ხელისუფლებამ მალევე დაამყარა კონტროლი ქვეყანაში. თურქეთის პრეზიდენტის ოფისის ცნობით,  დაღუპულთა რიცხვი 265-მდე აღწევს, 1 440 კი მძიმედ არის დაშავებული.  ქვეყნის ხელისუფლებამ ამბოხის ჩახშობის შემდეგ 3 000-მდე სამხედრო პირი დააკავა, მათ შორის მაღალი რანგის სამხედრო მოსამსახურეებიც არიან, 2700-ზე მეტი მოსამართლე კი გაათავისუფლა.