პარასკევის წარუმატებელი სამხედრო გადატრიალების შემდეგ თურქეთმა უკვე 6 000 ადამიანი დააკავა. ამის შესახებ ინფორმაციას BBC თურქეთის იუსტიციის მინისტრზე დაყრდნობით ავრცელებს.

"წმენდის ოპერაცია გრძელდება", - განუცხადა მინისტრმა სახელმწიფო მედიას და დაამატა, რომ დაპატიმრებულთა რიცხვი გაიზრდება.

დაპატიმრებულთა შორის არიან მაღალი რანგის სამხედრო პირები და მოსამართლეები. კვირას, დასავლეთ პროვინცია დენზილში 50-ზე მეტი მაღალი რანგის სამხედრო დააპატიმრეს. წარუმატებელი გადატრიალების შედეგად სულ მცირე 265 ადამიანი დაიღუპა.

პრეზიდენტმა ერდოღანმა არ გამორიცხა, რომ პარლამენტმა შესაძლოა სიკვდილით დასჯის აღდგენის შესახებ იმსჯელოს.

თურქეთში 15 ივლისს სამხედრო გადატრიალების მცდელობა იყო, თუმცა თურქეთის ხელისუფლებამ მალევე დაამყარა კონტროლი ქვეყანაში. თურქეთის პრეზიდენტის ოფისის ცნობით,  დაღუპულთა რიცხვი 265-მდე აღწევს, 1 440 კი მძიმედ არის დაშავებული.