პოლიციის 3 ოფიცერია მოკლული ცეცხლსასროლი იარაღიდან და რამდენიმე სხვა დაჭრილი ბატონ რუჟში, ლუიზიანაში, - განაცხადა ქალაქის მერმა. ინფორმაციას ამის შესახებ შეერთებული შტატების მედია ავრცელებს.

ოფიცრებმა ბატონ რუჟში საპასუხო ცეცხლი გახსნეს ჩასაფრებული ადგილიდან მათი მიმართულებით განხორციელებული სროლების შესაჩერებლად, რომელშიც სულ მცირე ერთი შეიარაღებული პირი მონაწილეობდა, განუცხადა მერმა კიპ ჰოლდენმა NBC-ის ახალ ამბებს.

ერთი ეჭვმიტანილი მოკლულია. პოლიცია სროლების ადგილს რობოტით ამოწმებს, რათა დარწმუნდნენ, რომ იქ ასაფეთქებელი მოწყობილობები არ არის, განაცხადა ბატონ რუჟის პოლიციის წარმომადგენელმა მაკნილიმ.

ლუიზიანას პოლიციის ინფორმაციით, მოკლულთაგან ერთი 41 წლის იყო, რომელიც ერთი წლის წინათ შეუერთდა სამსახურს, მეორე 32 წლის, პოლიციაში 10-წლიანი მუშაობის სტაჟით, ხოლო მე-3 დაღუპული პოლიციელი - შერიფის მოადგილე - 45 წლის იყო.  

CBS, CNN და NBC-ის ახალი ამბები ბატონ რუჟში პოლიციელებზე თავდამსხმელის ვინაობას ასახელებს. მათი ინფორმაციით, ის 29 წლის გავინია, კანზას სითიდან, (მიზური). კვირას მისი დაბადების დღე იყო. პოლიციას ეს სახელი ჯერ არ დაუდასტურებია.

პოლიციამ რეპორტიორებს განუცხადა, რომ ისინი ეძებენ ერთ ეჭვმიტანილზე მეტს და საზოგადოება ყურადღებით უნდა იყოს იმ ადამიანების მიმართ, რომლებსაც შავი ტანსაცმელი აცვიათ და ატარებენ გრძელ იარაღს, წერს სააგენტო „როიტერსი“.

ცოტა ადრე აღმოსავლეთ ბატონ რუჟის შერიფის ოფისმა განაცხადა, რომ პოლიცია და შერიფის მოადგილეები ჩართულნი იყვნენ სროლების ინციდენტში, რომელიც ადგილობრივი დროით, დაახლოებით დილის 9 სათზე მოხდა.

აღნიშნულ ინციდენტამდე რამდენიმე კვირის წინათ ავღანეთის ომის ფერადკანიანმა 25 წლის ამერიკელმა ვეტერანმა, რომელმაც განაცხადა, რომ მას სურდა „თეთრკანიანი ადამიანების მოკვლა“, დალასში საპროტესტო აქციაზე ჩასაფრებული ადგილიდან განხორციელებული თავდასხმისას პოლიციის 5 ოფიცერი მოკლა, 7 სხვა პოლიციელი და ორი მშვიდობიანი მოქალაქე კი დაჭრა.