საქართველოს ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა სამინისტრო დევნილებს მოუწოდებს, გამოიჩინონ სიფრთხილე და თაღლითობის ფაქტის არსებობის შემთხვევაში დაუყოვნებლივ აცნობონ სამართალდამცავ სტრუქტურებს, ან სამინისტროს.

ამის შესახებ დევნილთა სამინისტროს შიდა აუდიტის დეპარტამენტის უფროსმა, ზვიად ლათიბაშვილმა, შსს-ში დღეს გამართულ ბრიფინგზე განაცხადა.

მისი ცნობით,  2012 წლიდან დღემდე თაღლითობის 7 ფაქტია გამოვლენილი.

„ინფორმაცია თაღლითური ჯგუფის მოქმედების შესახებ ჩვენმა ბენეფიციარმა დევნილმა მოგვაწოდა. მივმართავ დევნილ მოსახლეობას და საზოგადოებას, არ დაუჯერონ მსგავს შემოთავაზებას. ბინების განაწილება ხდება კომისიურად, ღიად და გამჭვირვალედ. მოვუწოდებთ დევნილებს, რომ თაღლითობის არსებობის შესახებ ინფორმაცია მიაწოდონ სამართალდამცავ სტრუქტურებს და სამინისტროს. ანონიმურობა დაცული იქნება“, - განაცხადა ზვიად ლათიბაშვილმა.

შსს-ს ცნობით, თაღლითობის ბრალდებით, 3 პირი დააკავეს. გამოძიებამ დაადგინა, რომ დაკავებულებმა, წინასწარი შეთანხმებით, აფხაზეთიდან დევნილი ქალბატონი მოატყუეს, თითქოს დევნილთა და განსახლების სამინისტროში, ასევე, თბილისის მერიაში გავლენიანი ნაცნობები ჰყავდათ, რომელთა მეშვეობითაც შეეძლოთ მისთვის საჭირო ქულების მომატება და რიგის გარეშე, თბილისის ზღვის მიმდებარე ტერიტორიაზე არსებულ „ოლიმპიურ ქალაქში“ ბინის მიღებაში დახმარება. ამის სანაცვლოდ, ბრალდებულებმა ქალბატონს 15 000 აშშ დოლარი მოსთხოვეს, წინასწარ 7 000 აშშ დოლარი გამოართვეს, ხოლო დანარჩენი 8 000 აშშ დოლარის გამორთმევას მოგვიანებით აპირებდნენ.