საქართველოში თურქეთის ელჩის, ლევენთ გუმრუქჩუს განცხადებით, ბათუმში თურქეთის გენერალური კონსულის ინტერვიუ არასწორად იქნა წარმოდგენილი და განცხადებები არასწორად იქნა ინტერპრეტირებული მედიაში.

საქართველოს საგარეო საქმეთა სამინისტროს ინფორმაციით, ამის შესახებ ელჩმა საგარეო საქმეთა მინისტრის მოადგილე გიგი გიგიაძესთან შეხვედრაზე განაცხადა.

მიმდინარე წლის 16 ივლისს, თურქეთის გენერალურმა კონსულმა, იასინ თემისქანმა თურქეთში მომხდარ სამხედრო გადატრიალების მცდელობაზე საუბრისას, განაცხადა, რომ ბათუმის შაჰინის სკოლა-ლიცეუმში ტერორისტული დაჯგუფებებისთვის თაობებს ზრდიან. (აღნიშნული კომენტარის ქართული თარგმანი TV25-მა გაავრცელა).    

„ეს ხალხი იმაგრებს საკუთარ პოზიციებს სკოლების მეშვეობით, ანუ ზრდიან თაობებს, რომლებიც არა სახელმწიფოს, არამედ ტერორისტულ დაჯგუფებებს ემსახურებიან. სამწუხაროდ, აჭარაში არის მსგავსი სკოლები. ერთ-ერთია რეფაიდინ შაჰინის სკოლა-ლიცეუმი. მე მოვუწოდებ, აჭარის მოსახლეობას, ქართველ ხალხს, ნუ გაუშვებთ შვილებს ამ სკოლაში, ნუ ასწავლით, იმიტომ რომ ეს არის ტერორისტული დაჯგუფება და აქ ტერორისტულ მიზნებს ემსახურებიან. უახლოეს პერიოდში მივმართავ საქართველოს ხელისუფლებას, რათა ამ ორგანიზაციების სკოლები დაიხუროს“, - განაცხადა კონსულმა.    

მისივე თქმით, ფეთჰულა გიულენის ორგანიზაციას საგანმანათლებლო დაწესებულებების ქსელი აქვს. ის აჭარის მოსახლეობას მოუწოდებს, ბავშვები სკოლიდან გამოიყვანონ, წინააღმდეგ შემთხვევაში კი ისინი სავალალო შედეგის წინაშე აღმოჩნდებიან.

დღეს აჭარის ტელევიზიამ (TV25) ბათუმში თურქეთის რესპუბლიკის გენერალური კონსულის, იასინ თემიზქანის ინტერვიუს სრულ ვერსია გაავრცელა. როგორც ტელეკომპანიაში აღნიშნავენ, კონსულის მიერ ინტერვიუში გაკეთებულ განცხადებებს საკონსულოს თარჯიმანი თარგმნის. აჭარის ტელევიზიის ინფორმაციით, თურქეთის გენერალურმა კონსულმა, იასინ თემისქანმა მათთან ინტერვიუში განაცხადა, რომ ბათუმში შაჰინის სახელობის მეგობრობის ლიცეუმში ტერორისტებს ზრდიან.