მოძრაობის - „პაატა ბურჭულაძე - სახელმწიფო ხალხისთვის“ ლიდერი პაატა ბურჭულაძე მისი პარტიის დაკვეთით ჩატარებული კვლევის შესახებ გავრცელებულ ინფორმაციას უარყოფს.

ამის შესახებ მან „TV პირველის“ ეთერში ისაუბრა და აღნიშნა, რომ მოძრაობა „პაატა ბურჭულაძე - სახელმწიფო ხალხისთვის“ პოლიტიკური რეიტინგებისგან განსხვავებული ტიპის კვლევებით არის დაინტერესებული.

„ჩვენ ამ კვლევასთან არანაირი კავშირი არ გვაქვს. ჩვენ საერთოდ მსგავსი სახის კვლევებს არ ვატარებთ, ჩვენთვის ეს ძალიან დიდ ინტერესის საგანს არ წარმოადგენს. ჩვენ ვატარებთ კვლევებს იმის შესახებ თუ რა უჭირს მოსახლეობას, რა სჭირდება დღეს ყველაზე ძალიან მათ. ეს გვაინტერესებს.  ჩვენი კვლევა რომ ყოფილიყო, უფრო მეტს დავიწერდით, ნახავთ, რომ 12%-ზე ბევრად მეტი გვექნება. ამაში დარწმუნებული ვარ“,-განაცხადა ბურჭულაძემ.

გუშინ საინფორმაციო სააგენტო GHN-მა გაავრცელა ინფორმაცია, რომ პაატა ბურჭულაძის დაკვეთით, ივნისის ბოლოს კვლევა ჩატარდა და მასში საქართველოს დიდ ქალაქებში მცხოვრები 1200 რესპოდენტი მონაწილეობდა. კვლევის შედეგების მიხედვით, „პაატა ბურჭულაძე - სახელმწიფო ხალხისთვის“ რეიტინგში მესამე ადგილზეა და მას რესპონდენტების -12% უჭერს მხარს.

საინფორმაციო სააგენტოს ცნობით, კვლევაში პოლიტიკურ პარტიათა რეიტინგი ასე გამოიყურება: ერთიანი ნაციონალური მოძრაობა - 19%; „ქართული ოცნება“ - 18% „პაატა ბურჭულაძე - სახელმწიფო ხალხისთვის“ – 12%; „ალასანია - თავისუფალი დემოკრატები“ – 7%; „შალვა ნათელაშვილი- ლეიბორისტული პარტია“ – 6%; ირმა ინაშვილი - პატრიოტთა ალიანსი- გაერთიანებული ოპოზიცია - 3%; ბურჯანაძე - დემოკრატიული მოძრაობა - 3%; სხვა - 8%;  არ ვიცი/უარი პასუხზე- 24%.