ასპინძის მუნიციპალიტეტში, სულ რამდენიმე დღეში ძველი-ჭობარეთი-ორგორა საყუდაბელის დამაკავშირებელი გზის ყველაზე რთული მონაკვეთის სარეაბილიტაციო სამუშაოები იწყება, - განაცხადა guardian.ge-სთან საუბრისას ასპინძის მუნიციპალიტეტის გამგებელმა, ლევან ცაბაძემ.

მისი თქმით, აღნიშნული პროექტი სამწლიანია, რომლის პირველი ეტაპი გასულ წელს, ძველი-ჭობარეთის გზის რეაბილიტაციით დაიწყო და საბოლოოდ 2017 წელს დასრულდება.

(ფოტოზე: ასპინძის მუნიციპალიტეტის გამგებელი, ლევან ცაბაძე)

„ეს პროექტი ძალიან მნიშვნელოვანია ასპინძის მუნიციპალიტეტისთვის. გზის აღდგენით ოთხი სოფლის 1500-მდე მცხოვრები კეთილმოწყობილი გზით შეძლებს ადმინისტრაციულ ცენტრთან დაკავშირებას.

2016 წელს ჩვენს მიერ განსახორციელებელი პროექტები თითქმის 100%-ით დასრულდა, რომელთა სარეაბილიტაციო სამუშაოებზე ჯამში, 2 100 000 ლარი დაიხარჯა.

ამ ეტაპზე, მუნიციპალური განვითარების ფონდი რაგბის ბაზამდე მისასვლელი გზისა და სოფელ ივერიის გზის სარეაბილიტაციო სამუშაოებს ახორციელებს. დაბა ასპინძაში მიმდინარეობს ასევე 5 საცხოვრებელი კორპუსის შიდა ეზოების კეთილმოწყობითი სამუშაოები.

იწყება ასევე მნიშვნელოვანი პროექტი, რომელიც სოფელ ვარგავის გზის რეაბილიტაციის პირველ ეტაპს გულისხმობს“, - განუცხადა guardian.ge-ს ლევან ცაბაძემ.