რესპუბლიკელების საპრეზიდენტო კანდიდატმა დონალდ ტრამპმა განაცხადა, რომ იმ შემთხვევაში თუ ის ქვეყნის პრეზიდენტი გახდება, იგი ზეწოლას არ მოახდენს შეერთებული შტატების მოკავშირეებზე პოლიტიკური ლიდერების შევიწროებისა და სამოქალაქო თავისუფლების დარღვევების გამო – აღნიშნა რა, რომ შეერთებულმა შტატებმა "ჩვენი საკუთარი უსეწრიგობა უნდა შეაკეთოს", სანამ სხვა ერებს "ლექციებს" ჩაუტარებდა.

აღნიშნული განცხადება ტრამპმა The New York Times–სთან საუბრისას გააკეთა.

მან თქვა: "შეხედეთ რა ხდება ჩვენ ქვეყანაში. როგორ უნდა ჩავატაროთ სხვებისთვის ლექციები, როცა ადამიანები პოლიციელებს ცივსისხლიანად ესვრიან?"

დონალდ ტრამპმა ასევე განაცხადა, რომ თუ ის შეერთებული შტატების პრეზიდენტად იქნება არჩეული მან შესაძლოა ნატოს წევრი ქვეყნების გარანტირებულ მფარველობაზე უარი თქვას. ტრამპმა თქვა, რომ შეერთებულმა შტატებმა მოკავშირეებს დახმარება მხოლოდ მაშინ უნდა აღმოუჩინოს, თუ ისინი "დააკმაყოფილებენ მათ ვალდებულებებს ჩვენს მიმართ".

თუმცა, როგორც BBC წერს, ნატოს წევრ ყველა ქვეყანას ხელი აქვს მოწერილი ხელშეკრულებაზე, რომლის მიხედვითაც თუკი ერთ რომელიმე ქვეყანაზე თავდასხმას ექნება ადგილი, ალიანსის ყველა სხვა დანარჩენი წევრი ქვეყნები დახმარების ხელს უმართავენ თავდასხმის ობიექტს.

რუსეთის მხრიდან ნატოს წევრი ბალტიის ქვეყნებისადმი აგრესიის შესახებ დასმული შეკითხვის საპასუხოდ ტრამპმა განაცხადა, რომ ვაშინგტონმა უნდა მიატოვოს დიდი ხნის მფარველობები, რაც შეერთებულ შტატებს მსგავსი ერებისადმი აქვს შეთავაზებული.

მან ასევე თქვა, რომ დახურავს შეერთებული შტატების სამხედრო ბაზებს საზღვარგარეთ. "თუ ჩვენ გადავწყვეტთ შეერთებული შტატების დაცვას, ჩვენ ყოველთვის შევძლებთ განვალაგოთ ძალები" ამერიკული მიწიდან და "ეს იქნება გაცილებით ნაკლები ხარჯები", აღნიშნა მან.