ნინოწმინდისა და ახალქალაქის მუნიციპალიტეტებში მცხოვრებ სომეხი ეროვნების მოქალაქეების იმ ნაწილს, რომელთაც რუსეთის ან სომხეთის მოქალაქეობა მიიღეს და ამის გამო ავტომატურად შეუწყდათ საქართველოს მოქალაქეობა, ახალი რეგულაციების მიხედვით, საქართველოში წელიწადში 90 დღეზე მეტ ხანს დარჩენის შემთხვევაში ქვეყნიდან დეპორტაცია ემუქრებათ.

როგორც guardian.ge - სთან საუბარში ნინოწმინდის მუნიციპალიტეტის გამგებელი გაგიკ კარსლიანი აცხადებს, ამგვარი პრობლემის წინაშე ნინოწმინდაში სამასზე მეტი ადამიანი აღმოჩნდა, ახალქალაქში კი გაცილებით მეტი. 

„გამომდინარე იქიდან, რომ ქვეყანაში და მათ შორის ნინოწმინდის მუნიციპალიტეტშიც უმუშევრობის დონე მაღალია და დასაქმების პრობლემა მწვავედ დგას, ადამიანები იძულებულნი გახდნენ იმ ქვეყნების მოქალაქეობა მიეღოთ, სადაც მათ სამუშაოს მოძებნა გაუადვილდებოდათ, თუმცა ამან ავტომატურად გამოიწვია მათთვის საქართველოს მოქალაქეობის ჩამორთმევა და როცა ისინი თავიანთ ოჯახებში ბრუნდებიან, აქ დროის მხოლოდ შეზღუდულად გატარების უფლება აქვთ, რაც ვფიქრობ, რომ არასწორია. ჩემი ინფორმაციით, ამ თემაზე ახლო მომავალში პარლამენტი აპირებს მსჯელობას, ჩვენმა მაჟორიტარმა დეპუტატმა, ენზელ მკოიანმა უკვე დააყენა ეს საკითხი და იმედს ვიტოვებთ, რომ ხელისუფლებაში სათანადო გადაწყვეტილებას მიიღებენ, ისეთს, რაც არ დააზარალებს ჩვენი რეგიონის მოსახლეობას, იმედს ვიტოვებთ, სამასზე მეტ სომეხი ეროვნების მოქალაქეს ნინოწმინდაში, თავიანთ ოჯახებში დასარჩენად ვიზები არ დასჭირდებათ", - განაცხადა ნინოწმინდის მუნიციპალიტეტის გამგებელმა გაგიკ კარსლიანმა.