სომხეთის პრეზიდენტმა სერჟ სარგსიანმა ერევანში პოლიციის განყოფილების შენობაში გამაგრებულ შეიარაღებულ ჯგუფს მძევლების გათავისუფლების და იარაღის დაყრისკენ მოუწოდა. BBC –ის ცნობით, ეს არის სომხეთის პრეზიდენტის პირველი კომენტარი მას შემდეგ, რაც რამდენიმე დღის წინათ ერევანში პოლიციის განყოფილებაზე თავდასხმა განხორციელდა.

სერჟ სარგსიანის თქმით, მოვლენები სომხეთის კონსტიტუციისა და კანონების მკაცრი დაცვით განვითარდება. „პირადი შურისძიების ყველა მცდელობა კანონის ძალით იქნება აღკვეთილი“, - განაცხადა სარგსიანმა.

მისი თქმით, სომხეთში ახლა რთული და საპასუხისმგებლო პერიოდია.

17 ივლისს ერევნის პოლიციის ერთ–ერთი განყოფილების შენობაში შეიარაღებული ჯგუფი შეიჭრა და იქ მყოფები მძევლად აიყვანა.

პოლიციამ 21 ივლისს, საღამოს, სომხეთის დედაქალაქ ერევანში პოლიციის შენობასთან შეკრებილი დემონსტრანტები დაარბია. "სომხეთის სპუტნიკის" ცნობით, ოთხშაბათ საღამოს აქციის მონაწილეებსა და პოლიციას შორის შეტაკებები მოხდა. მომიტინგეები მოითხოვდნენ იმ ადამიანების საკვებით უზრუნველყოფას, რომელთაც პოლიციის განყოფილებაში მძევლები ჰყავთ აყვანილი, რადიკალებისთვის პოლიციის შენობაში პროდუქტების შეტანა კი ოპოზიციონერ დეპუტატს ნიკოლ პაშინიანს უნდა უზრუნველეყო, უარის მიღების შემდეგ კი ხალხის ნაკადი შეეცადა კორდონის გარღვევას, რის საპასუხოდაც პოლიციამ ცრემლსადენი გაზი და მანათობელი ყუმბარები გამოიყენა და ჰაერში გასროლები მოახდინა.

ღამით კი მცირე შესვენების შემდეგ პროტესტანტებმა კვლავ დაიწყეს ქვების სროლა სამართალდამცველების მიმართულებით. აქციის მონაწილეების თქმით, მდგომარეობა მას შემდეგ დაიძაბა, რაც პოლიციამ ერთ–ერთი დემონსტრანტი დააკავა.