პრემიერ მინისტრმა, „ქართული ოცნება-დემოკრატიული საქართველოს“ თავმჯდომარემ, გიორგი კვირიკაშვილმა ფოთში  მაჟორიტარი დეპუტატობის კანდიდატის წარდგენის შემდეგ, მაჟორიტარობის კანდიდატები ხობის საარჩევნო ოლქში და ასევე აბაშისა და მარტვილის გაერთიანებულ ოლქში წარადგინა.

კერძოდ, ხობში მაჟორიტარობის კანდდიატი გოდერძი ბუკია იქნება, აბაშისა და მარტვილის რაიონში კი - სოფლის მეურნეობის მინისტრი ოთარ დანელია.

როგორც გიორგი კვირიკაშვილმა აღნიშნა, ის გოდერძი ბუკიას დაახლოებით 20 წელია იცნობს.

"მოგეხსენებათ, გარკვეული პერიოდის განმავლობაში, კერძო სექტორშიც მომიწია მუშაობა და ბატონი გოდერძი ყოველთვის გამოირჩეოდა განსაკუთრებული აქტიურობით, განსაკუთრებული სიყვარულით, თავისი კუთხის, თავისი ხობის მიმართ. ყველა ადამიანი, ვისაც სურვილი აქვს, აგური დადოს ჩვენი ქვეყნის მშენებლობაში, ვისაც უნდა, რომ კეთილდღეობა მოიტანოს ჩვენი მოქალაქის ოჯახში, ერთიანდება ჩვენთან ერთად",- განაცხადა პრემიერმა.

მთავრობის მეთაურმა ხობში დაგეგმილ პროექტებზეც ისაუბრა და აღნიშნა, რომ მთავრობას აქვს მნიშვნელოვანი გეგმები, ხობში სპორტული კომპლექსების მშენებლობის, წყალმომარაგების, კანალიზაციის სისტემების გაუმჯობესების, ოჯახური სასტუმროების განვითარებისა და ამის ფინანსური ხელშეწყობის, ასევე, ადგილობრივი წარმოების პოტენციალის განვითარების მიმართულებით.

"ამისთვის, ბატონი გოდერძი ყოველდღე მუხლჩაუხრელად ზრუნავდა და მომავალშიც იზრუნებს", - განაცხადა გიორგი კვირიკაშვილმა.

რაც შეეხება ოთარ დანელიას, როგორც პრემიერ-მინისტრმა აბაშის რაიონში გამართულ შეხვედრაზე განაცხადა, ოთარ დანელია არის უაღრესად კვალიფიციური ადამიანი, რომელმაც ბოლო წლების განმავლობაში უმნიშვნელოვანესი რეფორმები წამოიწყო.

კვირიკაშვილი დარწმუნებულია, რომ ოთარ დანელია იქნება ლოკომოტივი არამხოლოდ აბაშის და მარტვილის, არამედ სამეგრელოს და მთელი ქვეყნის განვითარებაში.

„სიმართლე გითხრათ, ბევრი ვიფიქრე ამ გადაწყვეტილებაზე, როდესაც ვფიქრობდით გუნდში, ვინ წარგვედგინა მარტვილის და აბაშის მაჟორიტარ კანდიდატად. ნამდვილად ძნელი გადასაწყვეტი იყო, გამომდინარე იქიდან, რომ ოთარი ახორციელებს ძალიან მნიშვნელოვან რეფორმებს ჩვენი ქვეყნისთვის ყველაზე მნიშვნელოვან სფეროში - სოფლის მეურნეობაში. ვფიქრობთ, რომ პარლამენტში ნამდვილად არის ბევრი გასაკეთებელი იმისთვის, რომ ეს სფერო მართლაც გავხადოთ წამყვანი ჩვენი ქვეყნისთვის; გავხადოთ იმ სფეროდ, რომელიც დაასაქმებს ყველაზე მეტ ადამიანს და გააძიერებს ადგილობრივი წარმოების პოტენციალს“,- განაცხადა გიორგი კვირიკაშვილმა და დასძინა, რომ „ოთარ დანელია იქნება ერთ-ერთი წამყვანი ძალა გუნდში.

პრემიერმა თავის გამოსვლაში, ასევე, აღნიშნა, რომ ბოლო წლების განმავლობაში საქართველოში სერიოზული ცვლილებები მოხდა, კერძოდ, 5 წლის წინ ბიძინა ივანიშვილმა, ქართველ ხალხთან ერთად, დაიწყო პროცესი, რომელსაც მნიშვნელოვანი გარდატეხა მოჰყვა.

„ამის შედეგად დღეს გვაქვს გაცილებით უფრო თავისუფალი ქვეყანა, თავისუფალი ადამიანებით. შევადაროთ 4 წლის წინანდელი საარჩევნო პროცესი და დღევანდელი წინასაარჩევნო პროცესი. დღეს არავინ არავის დევნის; დღეს ტელევიზიიდან თავისუფლად ისმის კრიტიკული მოსაზრებები, ხანდახან გულსატკენი და არაობიექტური, მაგრამ ჩვენ ამას ვეგუებით, ვინაიდან ადამიანის თავისუფლება არის უზენაესი“, - განაცხადა პრემიერმა.

გიორგი კვირიკაშვილმა ისაუბრა ჯანდაცვის, სოფლის მეურნეობის სფეროებში განხორციელებულ რეფორმებზე და სამომავლო გეგმებზე ისაუბრა.

„ოთხი წლის თავზე დღეიდან, ჩვენ ვგეგმავთ, რომ თითოეულმა ოჯახმა თავის თავზე იგრძნოს ის სიკეთე, რომელიც იქმნება ქვეყანაში. ამისთვის გვაქვს მკაფიო ხედვა, ყოველდღიური ნაბიჯებით გაწერილი სამოქმედო გეგმა, დაწყებული განათლების სფეროთი, დამთავრებული ეკონომიკური და მმართველობითი რეფრომით, რომ ჩვენი მთავრობა ვაქციოთ ხალხის მოსამსახურედ. განათლების სფეროს ფუნდამენტური რეფორმის გარეშე შეუძლებელია ჩვენ რაიმე განვითარებას მივაღწიოთ, ჩვენი პრობლემების 90%, თუ 100% არა, დევს დღეს განათლების პრობლემებში. 4 წლის თავზე ჩვენ უნდა მივიღოთ შეუქცევადი პროცესი, როდესაც ყველა ოჯახი საკუთარ შემოსავლებზე იგრძნობს, თუ რა ცვლილებები განხორციელდა ქვეყანაში. როდესაც მე ამას ვსაუბრობ, რა თქმა უნდა, კარგად ვგრძნობ, რომ ყველაფერი კარგად ჯერ კიდევ არ არის; რომ უდიდესი პრობლემებია ქვეყნის რეგიონებში და არსებობს უდიდესი განსხვავება სხვადასხვა რეგიონების განვითარებაში, თუ გნებავთ, დედაქალაქსა და რეგიონებს შორის. ჩვენი მოვალეობაა, მეტი ყურადღება მივაქციოთ რეგიონებს, უბრალო ადამიანების ცხოვრებას. თითოეული ადამიანის ცხოვრების შეცვლიდან იწყება ნებისმიერი რეფორმა, რომელსაც ჩვენ ვაკეთებთ“, - განაცხადა გიორგი კვირიკაშვილმა.