„მე მინდა გთხოვოთ თანადგომა, მე მინდა, გთხოვოთ მხარდაჭერა, იმიტომ რომ ძალიან ბევრი რამე იქნება შედეგზე დამოკიდებული“, -განაცხადა აბაშის მოსახლეობასთან შეხვედრაზე სოფლის მეურნეობის მინისტრმა ოთარ დანელიამ, რომელიც მარტვილისა და აბაშის რაიონში მაჟორიტარი დეპუტატობის კანდიდატად დასახელდა.

მისი თქმით, გამარჯვებაში ეჭვი არავის ეპარება, მაგრამ „ქართულ ოცნებას“  აქვს ამბიცია,  ყველა რეკორდი მოხსნას.

დანელიამ მადლობა გადაუხადა პრემიერ-მინისტრს ნდობისთვის და აღნიშნა, რომ ეს არის ყველაზე დიდი ნდობა, რაც ცხოვრებაში ოდესმე ჰქონია.

„ეს არის ძალიან საინტერესო პროცესი. მიუხედავად იმისა, რომ ძალიან ბევრი მიმდინარე პროექტია სოფლის მეურნეობაში, რომელიც გაგრძელდება, ეს იყო ერთსულოვანი გადაწყვეტილება, იმიტომ რომ ჩვენ გუნდურად ვფიქრობთ, რომ ძალიან მნიშვნელოვანია, ჩვენი რესურსი იყოს დაბალანსებული და გადანაწილებული ქვეყნის მასშტაბით... მე მინდა გთხოვოთ თანადგომა, მე მინდა, გთხოვოთ მხარდაჭერა, იმიტომ რომ ძალიან ბევრი რამე იქნება შედეგზე დამოკიდებული. გამარჯვებაში ეჭვი არავის ეპარება, მაგრამ ჩვენ გვაქვს ამბიცია, მოვხსნათ ყველა რეკორდი და ამაში მე თქვენი ძალიან დიდი იმედი მაქვს. სამეგრელომ კიდევ ერთხელ უნდა დაამტკიცოს, რომ არის ერთ-ერთი ყველაზე ძლიერი რეგიონი და საქართველოს ხერხემალი“, - განაცხადა ოთარ დანელიამ.