„განვითარების არც ერთი გეგმა, რომელსაც ჩვენ მომავალი ოთხი წლისთვის ვადგენთ, არავითარ შემთხვევაში, არ გაივლის მოქალაქეების უფლებების დარღვევაზე, ადამიანის უფლებების გათელვაზე, რომელიც ადრე გვქონდა და რომლის მოწმენიც მთელი ქვეყანა გავხდით“, - ამ სიტყვებით მიმართა პრემიერ-მინისტრმა, გიორგი კვირიკაშვილმა წალენჯიხის მოსახლეობას, რომელსაც წალენჯიხისა და ჩხოროწყუს გაერთიანებული საარჩევნო ოლქის მაჟორიტარობის კანდიდატი გოგა გულორდავა წარუდგინა.

"ქართულო ოცნება - დემოკრატიული საქართველოს" თავმჯდომარის თქმით, ეს, გუნდის თითოეული წევრისთვის, უმნიშვნელოვანესი პრინციპია.

"როდესაც წინა ხელისუფლების პერიოდში ვუყურებდით ასი ათასობით დაპატიმრებულ ადამიანს, მე, როგორც ერთ რიგით მოქალაქეს, ყოველთვის მქონდა ასეთი აზრი, რომ არც ერთი უსამართლოდ დასჯილი ადამიანის შვილის ცრემლად არ ღირს მთელი საქართველო. ეს არის ჩვენი ხელისუფლების მთავარი მოწოდება და მთავარი არსი. სწორედ ამ კრედოს მიყვება ჩვენი გუნდის თითოეული წევრი. სწორედ ამ პრინციპის დაცვით, მაგრამ რა თქმა უნდა, ეფექტური, სწრაფი ნაბიჯების გადადგმით, ვივლით მომავალი ოთხი წლის განმავლობაში, რათა ადამიანურად და ამავე დროს ეფექტურად შევცვალოთ ქვეყანაში ცხოვრების დონე“, -განაცხადა პრემიერმა.

გიორგი კვირიკაშვილმა ასევე ისაუბრა მაჟორიტარობის კანდიდატ გოგა გულორდავას შესახებ და აღნიშნა, რომ მან, როგორც ადგილობრივმა, იცის, რა უხარია და რა სტკივა რაიონის მოსახლეობას.

პრემიერი დარწმუნებულია, რომ იგი იქნება ღირსეული წარმომადგენელი საქართველოს პარლამენტში.

"გოგას გააჩნია კვალიფიკაციაც, გააჩნია საჭირო ადამიანური თვისებები, რაც ალბათ ყველაზე მთავარია ასეთ დროს. მას ქვეყნის ხელისუფლებისგან მაქსიმალური მხარდაჭერა ექნება, რათა წალენჯიხის მოსახლეობის მოთხოვნები დავაკმაყოფილოთ“, -განაცხადა გიორგი კვირიკაშვილმა.