„თავისუფალი დემოკრატების“ გენერალურმა მდივანმა ალექსი პეტრიაშვილმა დღეს გამართულ პრესკონფერენციაზე განაცხადა, რომ “თავისუფალი დემოკრატები“ საპარლამენტო არჩევნებში მონაწილე პოლიტიკურ ძალებს შორის, „ქართული ოცნებისა“ და „ნაციონალური მოძრაობის“ შემდეგ მესამე ადგილს მყარად ინარჩუნებს.

„ბარიერს კარგად გაცდენილი ვართ და მყარი პოზიცია გვიკავია „პირველ სამეულში.“ სხვაობა ამ სამ პოლიტიკურ ძალას შორის არცთუ ისე დიდია. ყველაზე დიდი პოზიტივია, რომ ნეგატიური დამოკიდებულება ჩვენი პარტიის მიმართ ნულთან არის გათანაბრებული, რაც ნიშნავს, რომ ამომრჩეველს „თავისუფალი დემოკრატების“ მიმართ ნეგატიური დამოკიდებულება საერთოდ არ გააჩნია. ამაში კი, ნამდვილად ვართ ჩემპიონები. მეორე არჩევანში ყველა კვლევის მიხედვით, ჩვენი პარტია პირველ ადგილზეა“, – განაცხადა ალექსი პეტრიაშვილმა და დაამატა:

„არც ცხოვრებას და არც პოლიტიკას ვარდისფერი სათვალით არ ვუყურებ. გვაქვს ბევრი სამუშაო, რათა პარტიის მზარდი პოტენციალი გავაუმჯობესოთ. საუბარი ბარიერის გადალახვაზე არ არის, არამედ ჩვენი ამბიცია და რეალური გეგმა არის ის, რომ „თავისუფალი დემოკრატების“ გარეშე მთავრობის ფორმირება ვერცერთმა პოლიტიკურმა ძალამ ვერ შეძლოს“.