თავდაცვის მინისტრის, თინა ხიდაშელის განცხადებით, თავდაცვის სამინისტრო ჯერჯერობით ერთადერთი უწყებაა ამ ქვეყანაში, რომელმაც კორცხელის შემთხვევას ადეკვატური რეაქცია მისცა.

მისივე თქმით, კორცხელთან დაკავშირებულ კითხვებზე პასუხები გაცემული არ არის.

„ჩვენ შეიარაღებული ძალებიდან დავითხოვეთ სამხედრო მოსამსახურე, რომელიც სამწუხაროდ, მომხდარში მონაწილეობდა. მაშინვე გავაკეთეთ განცხადება, რომ არც ერთი წამით არ დავუშვებთ, თავდაცვის სამინისტროს რომელიმე თანამშრომელი რაიმე ტიპის ძალადობაში მონაწილეობდეს. ჩვენ ყველანი ერთად ველოდებით ამ საქმეზე გამოძიების დასრულებას“, - განუცხადა ჟურნალისტებს თავდაცვის მინისტრმა.

გუშინ პრეზიდენტის პრესსპიკერმა, ეკა მიშველაძემ განაცხადა, რომ პრეზიდენტ გიორგი მარგველაშვილის აზრით, პასუხი უნდა გაეცეს  კითხვას, რა კავშირი აქვს კორცხელის ინციდენტთან „ქართული ოცნების“ საარჩევნო შტაბის უფროსს, კახა კალაძეს.