ადამიანის უფლებათა დაცვის საკითხებში პრეზიდენტის მრჩევლის, კახა კოჟორიძის განცხადებით, შინაგან საქმეთა სამინისტრომ პრეზიდენტის სიძესთან, მინდია გოგოჭურთან დაკავშირებით გავრცელებული განცხადების გამო კანონი დაარღვია.

კერძოდ კი კახა კოჟორიძე შსს-ს „პერსონალურ მონაცემთა დაცვის შესახებ“ კანონის დარღვევაში ადანაშაულებს.

„იმთავითვე არსებობდა მთელი რიგი კითხვის ნიშნები. შინაგან საქმეთა სამინისტროს განცხადებაში, რომელიც საზოგადოებამ რამდენიმე დღის წინ იხილა, პირდაპირ ვიტყვი, რომ იყო „პერსონალურ მონაცემთა დაცვის შესახებ“ კანონის დარღვევა, როდესაც სამინისტრომ განაცხადა, რომ მინდია გ. არის სამჯერ ნასამართლევი. ეს ერთი კანონდარღვევა - მას არ ჰქონდა ამის თქმის უფლება“, - განაცხადა კოჟორიძემ.

მისივე თქმით, მეორე კანონდარღვევაა ის, რომ გოგოჭური ნასამართლეობის შესახებ ცნობას ითხოვს, რომელსაც ამ დრომდე ვერ იღებს.

„მეორე - მინდიამ უკვე მესამე დღეა რაც მიმართა შინაგან საქმეთა სამინისტროს და მოითხოვა ძალიან მარტივი რამე - ნასამართლეობის ცნობა. მან გადაიხადა საფასური იმისთვის, რომ ეს ცნობა დაჩქარებულად, 1 საათში მიეღო, თუმცა დღემდე არ მიუღია... მთლიანობაში არაჯანსაღი სიტუაცია იქმნება მთელი ამ საქმის ირგვლივ, რომელსაც სჭირდებოდა ჩვეულებრივად, სტანდარტულად სამართლებრივი პროცედურებით ჩატარებული გამოძიება და კანონის ყველა მოთხოვნის დაცვით შედეგის დადება“, - აღნიშნა კოჟორიძემ.

შსს-მ მიმდინარე წლის 25 ივლისს განცხადება გაავრცელა, სადაც აღნიშნულია, რომ ჩატარდა მინდია გოგოჭურის კუთვნილი ავტომანქანისა და საცხოვრებელი ბინის ჩხრეკა.

„რამდენიმე დღის წინ საქართველოს პრეზიდენტმა, სამართალდამცველების მიერ მისი ოჯახის წევრის ჩხრეკის ფაქტთან დაკავშირებით, ინფორმაცია მიაწოდა პრემიერ-მინისტრს. საქართველოს პრემიერ-მინისტრმა აღნიშნული შემთხვევის გარკვევა დაავალა შს მინისტრს. შესაბამისად, არსებობს ვარაუდი, რომ პრეზიდენტი დღევანდელ განცხადებაში, შესაძლოა, გულისხმობდა შემდეგ ფაქტს, კერძოდ:

შსს-ს ცენტრალურ კრიმინალურ პოლიციაში მიმდინარეობს გამოძიება სსკ-ს 236-ე მუხლის მეორე და მესამე ნაწილებით (ცეცხლსასროლი იარაღის მართლსაწინააღმდეგო შეძენა-შენახვა-ტარება). ოპერატიული ინფორმაციის საფუძველზე, სამართალდამცველების მიერ, თბილისში, 2016 წლის 28 ივნისს განხორციელდა სამი პირის ჩხრეკა: 1989 წელს დაბადებული, წარსულში რამდენჯერმე ნასამართლევი თორნიკე კ.-ს, 1988 წელს დაბადებული, წარსულში ნასამართლევი მიხეილ თ.-ს და 1989 წელს დაბადებული, წარსულში რამდენჯერმე ნასამართლევი მინდია გ.-ს. აქედან, ერთ-ერთი პირი იყო პრეზიდენტის მეუღლის შვილთან არარეგისტრირებულ ქორწინებაში მყოფი მამაკაცი. აღნიშნულ პირებს ჩაუტარდათ პირადი ჩხრეკა, რა დროსაც მიხეილ თ.-სა და მინდია გ.-ს რაიმე კანონსაწინააღმდეგო ნივთი არ აღმოაჩნდათ, ხოლო თორნიკე კ. -ს პირადი ჩხრეკისას ამოღებული იქნა ცივი იარაღი. აღნიშნული საგამოძიებო მოქმედება სასამართლოს მიერ კანონიერად იქნა ცნობილი.

ამავე ოპერატიული ინფორმაციის საფუძველზე, ჩატარდა მინდია გ.-ს კუთვნილი ავტომანქანისა და საცხოვრებელი ბინის ჩხრეკა, რა დროსაც რაიმე კანონსაწინააღმდეგო ნივთი არ აღმოჩნდა. შესაბამისად, მისი სისხლისსამართლებრივი პასუხისმგებლობის საკითხი, აღნიშნული გამოძიების ფარგლებში, არ დამდგარა.

აქვე ხაზგასმით აღვნიშნავთ, რომ ჩატარებული ოპერატიულ-საგამოძიებო ღონისძიება განხორციელდა საქართველოს კანონმდებლობის შესაბამისად, მონაწილე პირთა უფლებების სრული დაცვით და მიზნად ისახავდა შესაძლო დანაშაულის გამოვლენასა და პრევენციას. კანონის წინაშე ყველა თანასწორია. ამდენად, საპოლიციო ღონისძიების ნებისმიერი სხვა ფორმით ინტერპრეტაცია მიუღებლად მიგვაჩნია“,-ნათქვამია შსს-ს განცხადებაში.