„ერთიანი ნაციონალური მოძრაობის” წევრის სალომე სამადაშვილის შეფასებით, ის, რომ ამერიკის ეროვნულ-დემოკრატიული ინსტიტუტის (NDI) კვლევის  მიხედვით, ამომრჩევლის დიდ ნაწილს არ აქვს გადაწყვეტილი ვის მისცემს ხმას, პირდაპირ მიუთითებს ერთ ფაქტზე - ისინი ხელისუფლებისთვის ხმის მიცემას აღარ აპირებენ.

მისი თქმითვე, ის, რომ ამომრჩევლებს სხვა პოლიტიკური სუბიექტების სასარგებლოდ არ აქვთ გადაწყვეტილება მიღებული იმიტომ ხდება, რომ საარჩევნო კამპანია ახალი დაწყებულია.

„ეს ამომრჩეველი დღევანდელ ხელისუფლებას ხმა აღარ მისცემს, რადგან ყველამ ნათლად დაინახა ამ ხელისუფლებას რისი გაკეთებაც შეეძლო. რაც შეეხება იმას, რომ ამომრჩევლებს სხვა პოლიტიკური სუბიექტების სასარგებლოდ არ აქვთ გადაწყვეტილება მიღებული, ეს იმიტომ ხდება, რომ საარჩევნო კამპანია ახალი დაწყებულია. ჩვენ უნდა გვესმოდეს, რომ ეს გამოკითხვა ჩატარდა მაშინ, როდესაც ამომრჩევლამდე გზავნილების მიტანა ახალი დაწყებული იყო, არჩევნებამდე რამდენიმე კვირით ადრე კი გვექნება მდგომარეობა, როცა ამომრჩეველი საკმარისად იქნება ინფორმირებული. თუმცა, აქვე მინდა ვისაუბრო ხელისუფლების პასუხისმგებლობაზე - ის ვალდებულია ოპოზიციურ სპექტრს შესაძლებლობა მისცეს ჩაატაროს ნორმალური საარჩევნო კამპანია და ის, რაც ხდება დღეს ქვეყანაში - ძალადობის, თავდასხმის და გამოუძიებელი ინციდენტების სახით, რა თქმა უნდა, ასეთი გარემოს შექმნას ხელს უშლის” ,- განაცხადა სალომე სამადაშვილმა.

ამერიკის ეროვნულ-დემოკრატიული ინსტიტუტის (NDI) მიერ ჩატარებული კვლევის თანახმად, გამოკითხულთა 57 პროცენტს გადაწყვეტილი არ აქვს, ვის მისცემდა ხმას არჩევნებზე. კვლევის თანახმადვე, რესპონდენტთა 38 პროცენტს უკვე გადაწყვეტილი აქვს, თუ ვის მისცემდა ხმას არჩევნებზე ხვალ რომ საპარლამენტო არჩევნები იყოს.  

კვლევის საველე სამუშაოები მიმდინარე წლის 8 ივნისიდან 6 ივლისის პერიოდში ჩატარდა და საქართველოს მასშტაბით, პირისპირ ინტერვიუს წარმომადგენლობითი შერჩევის საფუძველზე 4 113 ადამიანი გამოიკითხა.  NDI-ის კვლევებს შვედეთის საერთაშორისო განვითარების და თანამშრომლობის სააგენტო (Sida) აფინანსებს და CRRC – საქართველო ატარებს.   საშუალო ცდომილების ზღვარი +/-2.1%-ია.