„რაც შეეხება იმ კვლევებს, რომელიც ახლა გამოქვეყნდა, როგორ გითხრათ? ადეკვატური კომენტარი რომ გააკეთო, ასეთ შემთხვევაში უნდა ვიყო კაცი და სასურველია კახელი“,- ასე შეაფასა „დემოკრატიული მოძრაობის“ თავმჯდომარემ, ნინო ბურჯანაძემ NDI-ს მიერ დღეს გამოქვეყნებული კვლევის შედეგები პოლიტიკური პარტიების რეიტინგების შესახებ.

მისი თქმით, ადეკვატური კომენტარი ამ კვლევებთან დაკავშირებით ძნელი გასაკეთებელია.

„პირველად დამწყდა გული რომ არ ვარ კაცი და თან კახელი, ხოლო რაც შეეხება სხვა შეფასებას,ერთი შემიძლია ვთქვა, რომ როგორც ჩანს ძალიან გულზე მოხვდათ საქართველოს უბლოკო სტატუსი, რაც არის საქართველოს რეალური გამთლიანების და ეკონომიკური წარმატების რეალური საფუძველი. ერთი რამ ფაქტია, ორი დღის წინ იყო გამოქვეყნებული,რომ ქვეყანაში საკმაოდ სერიოზულია რაოდენობა იმ ადამიანებისა ვისაც უნდა რუსეთთან ურთიერთობის დალაგება. ზოგს მეტად, ზოგს ნაკლებად, სწორედ რუსეთთან წარმოუდგენია. ამ ფონზე ის განცხადებები, რომელიც გაკეთდა დღეს, ის კომენტარები და ციფრები რომლებიც გამოქვეყნდა, როგორც მოგახსენეთ, იმსახურებს იმ კომენტარს, რომელსაც მე ადეკვატურად ვერ გავაკეთებ“- განაცხადა ნინო ბურჯანაძემ.

მისი ცნობით, „დემოკრატიულ მოძრაობას“ პრაქტიკულად ძალიან ინტენსიური კამპანია ჯერ დაწყებული არ აქვს, მიუხედავად იმისა, რომ ყველგან მუშაობს. ბურჯანაძის თქმით, სამწუხაროდ, პარტიის აქტივობები არ შუქდება ისეთი ინტენსივობით გარკვეული ტელევიზიების მხრიდან.

„დარწმუნებული ვარ, რომ ძალიან ბევრ ადამიანს გაუცრუვდება იმედი, ვინც ჩვენი არა კეთილმოსურნეა, არჩევნების შედეგების გამოცხადების დროს და ძალიან ბევრი ის ადამიანი, რომელიც გონივრულად უყურებს საქართველოს პრობლემების გადაწყვეტის შესაძლებლობას გახარებული, დარჩება იმ შედეგით, რომელსაც ჩვენ არჩევნებზე მივიღებთ“,-განაცხადა ნინო ბურჯანაძემ.