შეკვეთილში მდებარე საკონცერტო დარბაზ Black Sea Arena-ს დღეს, პოპ-მომღერალი კრისტინა აგილერა გახსნის. 

კრისტინა აგილერას კონცერტზე დასასწრები ბილეთების გაყიდვა ონლაინ რეჟიმში საიტიდან www.tkt.ge 12 ივლისს დაიწყო.  ბილეთის  ფასი 50 ლარიდან 600  ლარამდეა.

კონცერტზე დასწრების საშუალება 9 500-მდე მსურველს მიეცემა.  

ფონდმა „ქართუმ“ შეკვეთილში მდებარე 200 მილიონი ლარის ღირებულების საკონცერტო დარბაზი სახელმწიფოს გადასცა. საკონცერტო დარბაზთან ერთად სახელმწიფომ საჩუქრად მიიღო 2016 წლის სექტემბრამდე გაწერილი კულტურული პროგრამა მსოფლიო და ქართველი ვარსკვლავების მონაწილეობით, რომელიც დაფინანსებულია ფონდ „ქართუს“ მიერ. კონცერტებზე გაყიდული ბილეთებიდან მიღებული შემოსავალი კი სახელმწიფო ბიუჯეტში ჩაირიცხება.   

საკონცერტო დარბაზი 10 000 მაყურებელზეა გათვლილი და ადაპტირებულია შეზღუდული შესაძლებლობების მქონე პირთათვის. არენის ძირითად ნაწილს საკონცერტო სივრცე წარმოადგენს, რომელიც ორ დამოუკიდებელ შენობას აერთიანებს. ერთ შენობაში განთავსებულია კინოთეატრის დარბაზები, სწრაფი კვების ობიექტები, შეხვედრების ოთახები და სამედიცინო პუნქტი, ხოლო მეორე შენობაში დარბაზის ადმინისტრაციული ნაწილი, საგრიმიროები, ტექნიკური ოთახები და კაფეტერია. ამფითეატრის ტიპის ღია საკონცერტო დარბაზი მოძრავი მნათობი კედლებითა და მოძრავი სახურავითაა აღჭურვილი.