პარტია „ქართული ოცნება - დემოკრატიული საქართველოს“ თავმჯდომარემ, პრემიერ მინისტრმა, გიორგი კვირიკაშვილმა დღეს შიდა ქართლის მაჟორიტარი დეპუტატობის კანდიდატები წარადგინა.

კერძოდ კი  გორის რაიონში „ქართული ოცნების“ მაჟორიტარობის კანდიდატი იქნება თენგიზ ხუბულური, ქალაქ გორში - იოსებ მაკრახიძე, ხაშურში - ვალერი გელაშვილი,  ქარელში -  გიორგი თოთლაძე, კასპში - ირაკლი მეზურნიშვილი.

”ქალაქ გორის მაჟორიტარობის კანდიდატი ,,ქართული ოცნებიდან“ იქნება იოსებ მაკრახიძე. ბატონი იოსები გორელი კაცია, მშენებელია, იყო გორის საგზაო სამმართველოს უფროსი. გორელები მას კარგად იცნობთ. თავადაც კარგად იცის, რა სჭირდება ქალაქს. დარწმუნებული ვარ, გორი გამოუცხადებს ნდობას ბატონ იოსებს. 

გორის რაიონში ჩვენი მაჟორიტარობის კანდიდატი იქნება თენგიზ ხუბულური. ბატონ თენგიზს არაერთხელ გაუხარებია ქართველი ხალხი საკუთარი გამარჯვებებით და დარწმუნებული ვარ, იგი ჩვენთან ერთად კიდევ ერთხელ გაახარებს ჩვენს ქვეყანას, უკვე იმ გამარჯვებებით, რომლებიც ძირეულად შეცვლის რეგიონში სიტუაციას. 

ხაშურში ,,ქართული ოცნება“ მაჟორიტარობის კანდიდატად წარმოგიდგენთ ვალერი გელაშვილს. ბატონ ვალერისაც არ სჭირდება განსაკუთრებული წარდგენა, იგი პარლამენტის წევრია. ხაშურელი კაცია, თავისი კუთხის პატრიოტია და დარწმუნებული ვარ, ყურადღებას არ მოაკლებს ხაშურს და ხაშურელებს. 


ქარელში წარმოგიდგენთ გიორგი თოთლაძის კანდიდატურას. გიორგიმ, ახალგაზრდული ასაკის მიუხედავად, სერიოზული გამოცდილება შეიძინა გუბერნატორის მოადგილედ მუშაობისას. იგი გახლავთ პარტიის რაიონული ორგანიზაციის თავმჯდომარე, წარმატებული ადამიანია და მჯერა, რომ ასეთივე წარმატებული იქნება საქართველოს პარლამენტშიც, რაზეც მოწმობს თქვენი მხარდაჭერაც. 


კასპში ჩვენი მაჟორიტარი კანდიდატი იქნება ირაკლი მეზურნიშვილი. ირაკლი გახლავთ ეკონომიკის მეცნიერებათა დოქტორი და საერთაშორისო სამართლის მაგისტრი. იგი ახლა შემოდის პოლიტიკაში და თავის ახალგაზრდულ ენერგიას და გამოცდილებას არ მოაკლებს კასპელების ინტერესების დაცვას საქართველოს პარლამენტში”, -განაცხადა კვირიკაშვილმა.